Oqıǵa ornynda qaza bolǵandar men zardap shekkender joq.
Qyzylorda oblysy Jalaǵash aýdanynda qatty jel turǵyn úı shatyrlaryn ushyryp áketti, dep habarlaıdy Almaty-akshamy.kz Egemen.kz silteme jasap.
Oqıǵa 6 shildede jergilikti ýaqytpen saǵat 14.30 shamasynda bolǵan.
Aýdan ortalyǵyndaǵy kóp páterli, «Qyzylorda sý toraby» memlekettik mekemesine tıesili turǵyn úılerdiń shatyrlary ushqan.
«Kóp páterli úıdiń shatyry jáne elektr baǵanasy sol aýmaqta ornalasqan avtoturaqtaǵy 2 avtokóliktiń ústine túsken. Sondaı-aq «Qyzylorda sý torabyna» 211-beket basynda ornalasqan turǵyn úı shatyrynyń jartysy jerge qulaǵan», - dedi oblystyq tótenshe jaǵdaılar departamentiniń bólim bastyǵy Nurbol Isanov.
Departament málimetinshe, oqıǵa ornynda qaza bolǵandar men zardap shekkender joq. Jergilikti atqarýshy organdar komısıasy jumys istep jatyr.