QR Ǵylym jáne joǵary bilim mınıstrligi bastaǵan delegasıa 2025 jyldyń qańtar aıynyń 23-25 aralyǵynda Ulybrıtanıada ótip jatqan halyqaralyq Bett UK konferensıasyna qatysýda.
Halyqaralyq sharada elimizdiń joǵary oqý oryndarynyń arnaıy pavılony ornatyldy, dep habarlaıdy aqsamnews.kz.
Bett UK konferensıasy aıasynda QyzPU Basqarma Tóraǵasy – Rektory Gúlmıra Qanaı jáne Halyqaralyq baǵdarlamalar ortalyǵynyń prezıdenti Ádil Qusmanov Sasseks ýnıversıtetiniń Vıse-kansleri Sasha Rosnılmen kezdesý ótkizip, eki ýnıversıtet arasyndaǵy qos dıplom baǵdarlamalaryn iske qosý máselesin talqylady.
2023 jyly eki ýnıversıtet arasynda ózara yntymaqtastyq týraly memorandýmǵa qol qoıylyp, qazirgi ýaqytta birneshe mańyzdy joba júzege asyrylyp jatyr.
«QyzPU men Ulybrıtanıa Keńesi arasynda yntymaqtastyq týraly memorandým aıasynda Fılologıa ınstıtýtynan 3 doktorant jáne 5 oqytýshy Sasseks ýnıversıtetindegi jazǵy mektepke qatysyp, tájirıbe almasty. Aıta keterlik jaıt, Sasseks ýnıversıteti Ulybrıtanıanyń úzdik 50 joǵary oqý ornynyń qataryna kiredi. Sonymen qatar, «Bolashaq» halyqaralyq baǵdarlamasynyń «500 ǵalym» ǵylymı taǵylymdama aıasynda 2023 jyly Fılologıa ınstıtýtynyń 2 oqytýshysy taǵylymdamadan sátti ótti. Qazirgi ýaqytta 2 oqytýshy osy ýnıversıtette biliktilikterin arttyrýda. Brıtandyq Keńespen birlesken memorandým negizinde Fılologıa ınstıtýtynyń stýdentteri Future English Online Teacher Community baǵdarlamasyna qatysý múmkindigine ıe boldy. 2023 jyly bul baǵdarlamaǵa 25 stýdent, al 2024 jyly 19 stýdent qatysyp, halyqaralyq deńgeıdegi sertıfıkattarǵa ıe boldy», – dedi Fılologıa ınstıtýtynyń dırektory Ashınova Kýnıpa Ahatovna.
Qazaq ulttyq qyzdar pedagogıkalyq ýnıversıteti men Sasseks ýnıversıteti arasyndaǵy yntymaqtastyq ǵylym men bilim salasynda jańa belesterdi baǵyndyrýǵa baǵyttalǵan mańyzdy qadam bolyp tabylady. 2023 jyly ótkizilgen 7 kúndik semınar eki ýnıversıtettiń profesorlyq-oqytýshylyq quramynyń jáne doktoranttarynyń ǵylymı áleýetin arttyrýǵa zor úles qosty.
«2023 jyldyń shilde aıynda Sasseks ýnıversıteti men Qazaq ulttyq qyzdar pedagogıkalyq ýnıversıteti arasynda profesorlyq-oqytýshylyq quram men doktoranttarǵa arnalǵan semınar uıymdastyryldy. Semınar barysynda Sasseks ýnıversıtetiniń bilikti doktorlary men profesorlary dárister oqyp, ozyq tájirıbelerimen bólisti. Al semınardyń kelesi kúnderinde toptyq jumystar júrgizilip, qatysýshylar ózderiniń zertteý taqyryptaryn tanystyryp, olardy ári qaraı damytý joldary boıynsha kásibı keńester aldy. Sarapshylar tarapynan usynylǵan pikirler qatysýshylardyń ǵylymı-zertteý daǵdylaryn jetildirýge aıtarlyqtaı yqpal etti. 2024 jyly biz sheteldik áriptesterimizdiń zertteý jobasyna qatysý múmkindigine ıe boldyq. Bul is-shara ǵylymı jumysymyzdy ári qaraı damytý úshin zor múmkindik boldy. Bul taza kásibı tájirıbe almasý boldy dep aıtýǵa tolyq negiz bar. Semınarǵa qatysqan birqatar oqytýshy bir apta kóleminde ózderiniń áriptesterine kýrs uıymdastyrdy. Sol baǵyttaǵy oqý jáne tájirıbe almasý maqsattary júzege asyp, oqý ornynyń ǵylymı áleýetin arttyrýǵa úles qosty», – dedi magıstr, QyzPU aǵa oqytýshysy Sabıt Botakóz.
Qazirgi tańda QyzPU-dyń profesor, oqytýshylary «Bolashaq» halyqaralyq baǵdarlamasynyń «500 ǵalym» jobasy aıasynda Ulybrıtanıada Sasseks ýnıversıtetinde ǵylymı taǵylymdamadan ótip jatyr. Solardyń biri – Shetel tilin kásibı oqytý kafedrasynyń aǵa oqytýshysy Marıta Snabekova 2024 jyldyń 1 naýryzynan bastap atalǵan ýnıversıtettiń Bilim berý jáne áleýmettik jumystar mektebinde taǵylymdamadan ótip jatyr. Bilim berýdegi menedjment baǵytyn tańdaǵan ǵalym joǵary bilim berý pedagogıkasyndaǵy zertteýler men ınovasıalar taqyrybyn zertteýde.
«Joǵary oqý oryndaryndaǵy pedagogıka, zertteý jáne kóshbasshylyqqa basa nazar aýdaryp, eksperımentaldy tájirıbelerine, tájirıbeli muǵalimderdiń tálimgerlik kómeginen jáne bilim berý salasyndaǵy sarapshy zertteýshilerdiń tájirıbelerinen kásibı biliktiligimdi arttyryp jatyrmyn. Taǵylymdama aıasynda dárister, semınarlar, tájirıbelik sabaqtarǵa qatysý arqyly bilim berý salasyndaǵy kásibı bilimimdi arttyryp qana qoımaı, sonymen qatar sheteldik áriptesterimizden joǵary bilim berýdegi tájirıbelerin, stýdenttermen komýnıkasıa ornatý tásilderin, baǵalaý ádis-tásilderin jáne joǵary oqý oryndarynda oqytý men oqý sapasyn arttyrý múmkindigine ıe boldym. Mádenı is-sharalarǵa qatysý arqyly aǵylshyn mádenıetimen jaqynnan tanystym. «500 ǵalym» taǵylymdamasy boıynsha «Bolashaq» halyqaralyq stıpendıasynyń ıegeri atanýyma jáne úzdik sheteldik oqý oryndarynyń biri Sasseks Ýnıversıtetinde bilim alýyma basty sebepker – ekijaqty ózara yntymaqtastyq týraly memorandýmǵa qol qoıylyp, bizge biliktilikti arttyrý kýrsyna qatysýǵa múmkindiktiń berilýi dep bilemin. Ýnıversıtetimizdiń rektory Gúlmıra Ámirhanqyzy Qanaıǵa osyndaı múmkindik úshin alǵysymdy bildiremin», – dedi Marıta Mýrzabekovna.
2023 jyldan beri eki ýnıversıtet Brıtandyq keńestiń úsh birdeı grantyna ıe boldy: qos dıplom baǵdarlamalaryn daıyndaý maqsatynda – 10 000 fýnt sterlıń; ózara ókilettikter ashý maqsatynda – 25 000 fýnt sterlıń; jáne aǵylshyn tili muǵalimderiniń biliktiligin arttyrý maqsatynda – 30 000 fýnt sterlıń granttyq qoldaý berildi.
Jaqyn arada eki ýnıversıtet arasynda PGCE (Postgraduate Certificate Programme) jáne split PhD baǵdarlamalaryn bastaý josparlanýda.