Búgin Qazaq ulttyq qyzdar pedagogıkalyq ýnıversıtetinde belgili qoǵam qaıratkeri, til janashyry, QyzPU túlegi Orazkúl Asanǵazyqyzynyń «Otbasy berekesi» atty jańa kitabynyń tanystyrylymy ótti, dep habarlaıdy aqshamnews.kz.
Aıtýly sharaǵa ýnıversıtettiń rektory Gúlmıra Qanaı, profesorlyq-oqytýshylyq quram men stýdentter, qoǵam qaıratkerleri, Orazkúl Asanǵazynyń týystary, dostary jáne zamandastary qatysty.
Kitaptyń tusaýkeser rásimine rektory Gúlmıra Qanaı, jazýshy, pedagogıka ǵylymdarynyń doktory Sovet-Han Ǵabbasov, Qazaqstannyń eńbek sińirgen qaıratkeri, qazaqtyń aıaýly aqyn qyzy Aqushtap Baqtygereeva, zań ǵylymdarynyń doktory Jalaırı Ómiráli Shakarapuly, tarıh ǵylymdarynyń doktory, profesor Qoıgeldi Mámbet Quljabaıuly qatysyp, kitaptyń qyzyl lentasyn qıdy.
Asanǵazy Orazkúl Asanǵazyqyzy – qoǵamda óz orny bar, ulttyń tili, dástúri jáne mádenıetin saqtaý jolynda belsendi qyzmet etip kele jatqan kórnekti tulǵa. Bul kitap jastarǵa ulttyq qundylyqtardy nasıhattaý, otbasy berekesin saqtaý jáne urpaq tárbıesine úlken jaýapkershilikpen qaraý qajettiligin túsindirý maqsatynda jazylǵan.
«Men alǵashynda «Otbasy berekesi» taqyrybynda dáris oqyp júrdim. Keıin osy dáristerimdi jınaqtap, kitap etip shyǵardym. Kitap úsh taraýdan turady: «Otan otbasynan bastalady», «Otbasy berekesi mahabbatta», «El búginshil, meniki erteń úshin...». Iaǵnı, dáristerimde qoldanǵan áńgimelerimdi óz ómirlik tájirıbemmen sabaqtastyryp jazdym. Kitaptyń eń basty ereksheligi – onyń ómirsheńdigi. Ol otbasy qurýdy josparlaǵan jastarǵa da, ómirdiń talaı belesin artqa tastaǵan qarıalarǵa da arnalǵan»,-dedi Orazkúl Asanǵazyqyzy.
«Otbasy berekesi» kitaby – ulttyq tárbıe men otbasylyq qundylyqtardy dáripteıtin mańyzdy eńbek. Kitapta qazaq otbasyndaǵy tárbıeniń mańyzy, ata-ana róli, urpaqtar sabaqtastyǵy jáne otbasyndaǵy berekeniń saqtalýy týraly oılar men usynystar qarastyrylǵan.
«Kitapty oqyp shyqtym. Bolashaq jastar úshin naǵyz baǵdarsham desem, artyq aıtqanym emes. Kitapty oqı otyryp, avtorymen suqbattasyp otyrǵandaı áser aldym. Keıbir ómirlik suraqtaryma osy týyndy arqyly jaýap taptym. Qazaqtyń tektilik máselesi tereńinen talqylanǵan qundy eńbek. Barshańyzǵa oqýǵa keńes beremin!»,-dedi Qazaq ulttyq qyzdar pedagogıkalyq ýnıversıtetiniń qaýymdastyrylǵan profesory Aısulý Kenjan Molynbaıqyzy.
Kesh barysynda kitaptan úzindiler oqylyp, avtordyń oılary men týyndysynyń negizgi ıdeıalary talqylandy. Sonymen qatar qatysýshylar kitaptyń ózektiligi men otbasy tárbıesiniń qazirgi qoǵamdaǵy orny týraly pikir almasyp, rýhanı jańǵyrýdy qamtamasyz etý joldary jaıly sóz qozǵady.
Orazkúl Asanǵazyqyzynyń «Otbasy berekesi» kitaby – otbasy qundylyqtaryn nasıhattaıtyn qundy týyndy. Bul kitap tek jastarǵa ǵana emes, otbasylyq ómirdiń mánin tereńinen uǵynǵysy keletin árbir janǵa arnalǵan.