«Tek kitap pen bilim ǵana bizdi adamdy shynaıy súıýge, eńbegin qurmetteýge jáne onyń úzdiksiz eńbeginiń tamasha jemisine súısine bilýge qabiletti, rýhy myqty, adal, aqyldy adam ete alady» degen eken M.Gorkıı. Munyń syrtynda kitaptyń, ádebıettiń aıtýly bir mindeti onyń tárbıelik mánimen astasyp jatatyny anyq.
Bul turǵydan alǵanda, kezindegi keńestik júıe ádebıettiń osy qyryn óziniń ıdeologıalyq jumysyna sheber paıdalandy. Sóıtip, úlgili oktábráttan bastap, minsiz pıoner, aldyńǵy qatarly komsomol, adal komýnıs, jalpy, sosıalısik qoǵamnyń ıdeal azamaty beınesiniń úzdik úlgilerin naqty ádebı obrazdar arqyly qalyptastyryp berdi. Búkil halyqqa kún kósem Vladımır Ilıch Lenınniń beınesi úlgi etip usynyldy. Osy nasıhatqa kúmánsiz sengendigimiz sonshalyq, bárimiz bala kúnimizde kishkentaı Volodányń M.Shagınán shyǵarmalary arqyly sanamyzǵa ábden sińisti bolǵan is-áreketin múltiksiz qaıtalaýǵa tyrystyq. Týra sol sıaqty qystygúni bıik tóbeden tikemizden tik turyp, qoryqpaı, qulamaı syrǵanaýǵa jattyqtyq, jazdygúni jap-jasyl baqtyń ońashalaý tusyna shaǵyn ǵana jazý ústelin jasatyp alyp, kitap oqýǵa, jazý-syzýmen aınalysýǵa áýestendik.
Keıinirek kolhozdyń kúzgi jıyn-terin nýqanynda erte jaýǵan qardyń astynda qalǵan ushy-qıyrsyz egis alqabyndaǵy júgerini qolmen úzýge týra kelgende brıgadırdiń bárimizge «Qurysh qalaı shynyqtydaǵy» Pavel Korchagındi úlgi etkeni de esimizde. Bizden bólek, jer-jerdegi, el-eldegi qanshama jasóspirim pıonerler otrádynyń jetekshisi Tımýr men onyń komandasynyń is-qımylyn qaıtalady! Bylaısha aıtqanda, orys ádebıetindegi Pavel Korchagın, Gleb Jeglov, Shtırlıs sıaqty basqa da kóptegen keıipkerlerdiń áralýan kezeńder men túrli býyndardyń kúlttik tulǵasyna aınalǵany anyq. Máselen, ótken ǵasyrdaǵy orys zıalysynyń beınesi, ádette, doktor Jıvagomen baılanystyrylady. Al zamandastaryn sońynan erte bilgen Tımýr beınesine balalar armıasynyń kóshbasshysy tulǵasy toptastyrylǵany daýsyz.
Belgili bir dárejede sımvolǵa aınalǵan osy keıipkerlerdiń qaı-qaısysy da – qalamger qaýymnyń qıalynan týyndaǵan ádebı obraz. Shyndyǵynda, búkil qoǵam sol obrazdarǵa qarap boı túzedi, jamanynan jırendi, jaqsysynan úırendi. Ult urpaǵyna úlgi bolatyn mundaı keıipkerler qazaq ádebıetinde de bar, biraq neken-saıaq. Balalar ádebıetine qatysty aıtqanda oıymyzǵa oralatyny – Berdibek Soqpaqbaevtyń Qojasy men Sansyzbaı Sarǵasqaevtyń, Mashqar Gýmerovtiń jekelegen shyǵarmalary ǵana. Qojanyń ár balaǵa tanys keıipkerge aınalýynyń birden-bir syry – «Meniń atym – Qoja» boıynsha kıno túsirilgendiginde. Al S.Sarǵasqaevtyń «Qaısar qyz», «Sáýleniń jańa dostary», «Sulýtór», M.Gýmerovtiń «Toǵyz tosqaýyl» tárizdi qyzyqty oqıǵalarǵa toly, jas jetkinshekterdiń oı-armany, qoǵamǵa paıdaly isteri, óner-bilimge degen qushtarlyǵy, bir-birine adaldyǵy, dostyq qarym-qatynastary sýrettelgen shynaıy shyǵarmalaryn bireý bilse, bireý bilmeıdi.
Qazaqtyń basqa da kóptegen qalamgerleriniń balalar úshin asa paıdaly osyndaı týyndylary bar. Ókinishke qaraı, nasıhatynyń joqtyǵynan kópshilikke jetpeı jatady. Negizi, taspaǵa túsirilip, kıno tilinde sóılegen jaǵdaıda kez kelgen kórkem shyndyqtyń ómirsheń de, ótimdi de bolary anyq. Bul rette, buqaraǵa áseriniń kúshtiliginen de «ónerdiń ishindegi eń mańyzdysy» sanalǵan kıno salasynyń qudiretin moıyndamaý áste múmkin emes.
Saıyp kelgende, ádebıet pen kıno janrlarynyń bir-birimen salalasa, sabaqtasa áreket etkeni, tyǵyz birlikte damyǵany óner úshin de, jalpy, qoǵam úshin de áldeqaıda tıimdi bolar edi. Ásirese ultymyzdyń jas urpaǵy ózgeniń emes, ózimizdiń ádebı keıipkerlerimizge qarap oı túzesin, boı túzesin desek, osy jaǵyn eskergenimiz abzal.