Qazaq ulttyq qyzdar pedagogıkalyq ýnıversıtetinde Pedagogıka jáne psıhologıa ınstıtýty, Psıhologıa kafedrasynyń baǵdarlama kóshbasshysy Topanova Gúlmıra Týıaqqyzy men profesorlyq-oqytýshylyq quramynyń uıymdastyrýymen «PsyLab: Kásibı daǵdylar men tájirıbe alańy» atty biregeı kópformatty semınar ótti, dep habarlaıdy aqshamnews.kz
Semınarǵa pedagogıka men psıhologıa salasynyń mamandary, joǵary oqý oryndarynyń oqytýshylary, bilim berý uıymdarynyń jetekshileri men psıhologtary, steıkholderler, quqyq qorǵaý organdarynyń ókilderi, stýdentter men jas mamandar qatysty.
«PsyLab: Kásibı daǵdylar men tájirıbe alańy» sharasynyń maqsaty – stýdentter men mamandarǵa kásibı tájirıbe almasý múmkindigin usyný, psıhologıa jáne pedagogıka salasyndaǵy sońǵy jetistikter men tájirıbelermen tanystyrý, bolashaq mamandardyń kásibı daǵdylaryn jetildirý jáne olardy saladaǵy jetekshi mamandarmen tanystyryp, mansaptyq baǵyttaryn aıqyndaýǵa kómek kórsetý.
«Búgingi semınardyń negizgi baǵyty – jumys berýshiler men ártúrli saladaǵy psıholog mamandarmen kásibı kezdesip, tyǵyz baılanys ornatý, stýdentterimizdiń oqýyn támamdaǵannan keıin jumysqa ornalasýyna jol kórsetý. Iaǵnı, bilikti mamandardyń keńesterin tyńdaı otyryp, stýdentter ózderiniń bolashaq baǵdarlaryn aıqyndaı alady. Sharaǵa kelgen barlyq steıkholderlerge aıtar alǵysymyz sheksiz»,-dedi QyzPU Pedagogıka jáne psıhologıa ınstıtýty, Psıhologıa kafedrasynyń oqytýshysy İnkar Keńesbekova.
Semınarda bilim berý uıymdaryndaǵy pedagog-psıhologtyń róli, bilim berý júıesindegi mańyzy, balalarmen jáne jasóspirimdermen jumys isteýdiń erekshelikteri tanystyryldy. Sondaı-aq jas mamanǵa qoıylatyn talaptar, jumys berýshilerdiń kútetin daǵdylary jáne bilim berý salasyndaǵy mansaptyq múmkindikter týraly sóz qozǵaldy. Inklúzıvti bilim berý men erekshe bilim berýdi qajet etetin balalarmen jumys isteıtin psıhologtardyń qazirgi ýaqytta suranysqa ıe mamandyqtardyń biri ekendigi aıtyldy.
Kezdesýde Almaty qalasy boıynsha Qylmystyq-atqarý júıesi departamentiniń sottalǵandar arasyndaǵy tárbıelik, áleýmettik-psıhologıalyq jumys bóliminiń bas mamany, QR İİM QAJK ádilet podpolkovnıgi Shynar Hýsaınova kásibı tájirıbesimen bólisip, óz salasyndaǵy kezdesetin qıyndyqtar men qyzyqty sátteri týraly aıtyp, stýdentterdi osy salada jumys isteýge shaqyrdy.
«Búgin Qazaq ulttyq qyzdar ýnıversıtetine kelip, qylmystyq atqarý júıesiniń mańyzdylyǵyn túsindirdim. Qoǵam bolǵan soń, ártúrli adam bolady. Bizdiń jumysymyzdyń mańyzdylyǵy – qylmys jasap, bas bostandyǵynan aıyrý oryndaryna túsken azamattarǵa tárbıelik jáne psıhologıalyq kómek kórsetip, olardy bostandyqqa shyǵýǵa daıyndaý. Bul mamandyqtyń mańyzy óte joǵary. Sol sebepti, bolashaq psıholog mamandyǵynda bilim alyp júrgen stýdentterdi osy salada bilikti maman bolýǵa shaqyramyn»,-dedi Shynar Hýsaınova.
Kezdesýde stýdentter kásibı mamandarǵa ózderin tolǵandyrǵan suraqtaryn qoıyp, tushshymdy jaýaptar aldy.
«Búgin psıhologıa salasyndaǵy kóptegen mamandarmen tanysyp, qundy aqparat aldym. Bul kezdesý meniń mamandyǵyma degen qyzyǵýshylyǵymdy arttyra tústi. Mamandyǵymnyń qoǵamdaǵy mańyzdylyǵyna kóz jetkizdim. Biz úshin osyndaı kezdesý uıymdastyrǵan uıymdastyrýshylarǵa alǵys aıtamyn», – dedi «Psıhologıa» bilim berý baǵdarlamasynyń 1 kýrs stýdenti Ásel Eltaeva.
Bul semınar stýdentter men jas mamandarǵa psıhologıa salasyndaǵy kásibı tájirıbe almasýǵa, óz mansaptaryn qalyptastyrýǵa múmkindik berdi. Sharanyń nátıjesinde qatysýshylar ózderiniń bolashaq kásibı baǵyttaryn aıqyndap, psıhologıa men pedagogıka salasyndaǵy suranysqa ıe mamandyqtar týraly mańyzdy aqparat aldy.