Balalar jyly aıasynda Almatynyń Ortalyq mádenıet jáne demalys saıabaǵynda ashyq aspan astynda gúlder festıvali ótti.
«Qyzǵaldaq» festıvali – Alataýdyń baýraıy Almatyny qyzǵaldaqtyń «tarıhı otany» retinde tanytý jáne ártúrli mádenı festıváldar ortalyǵyna aınalǵan súıikti qalamyzdyń mádenı ımıjin kóterý maqsatyndaǵy aýqymdy joba. Sonymen qatar, kórme óskeleń urpaqtyń óz qalasyna degen súıispenshiligi men patrıottyq sezimderin arttyrýǵa, jastar shyǵarmashylyǵyn damytýǵa baǵyttalǵan.
Festıvál Ortalyq mádenıet jáne demalys saıabaǵynyń sahna aınalasynda ótti. Merekelik shara- ǵa kelgen qonaqtar men kórermen- derdiń kóńil kúıin kóterý úshin sahna festıvál taqyrybyna qaraı kóktem stılinde bezendirilip, úlken qyzǵaldaq pishinderimen kórkemdeldi. Saıabaqta qydyryp júrgen kezdeısoq adamdardy da, festıvalge arnaıy kelgen qala turǵyndaryn da ásem áýen men sah- nany aınala qoıylǵan sýretshi- lerdiń týyndylary qarsy aldy.
– Qyzǵaldaqtyń tarıhı otany sanalatyn alpaýyt meken Almaty qalasynda «Qyzǵaldaq» festıvalin ótkizý – biz úshin mindet. Bul shaha- rymyzda tuńǵysh ret ótkizilip jatqan aýqymdy joba. Festıválde 4 atalym boıynsha baıqaý ótip jatyr. Barlyǵy 400-den as- tam ónerpaz qatysýda. Áý basta qatysýshylarǵa 400 myń kóleminde syıaqy qarastyrylǵan. Alaıda baıqaýǵa nıet bildirýshilerdiń kóp bolýyna baılanysty qosymsha 200 myń qarastyrylyp, jalpy kólemi 600 myń bolatyn syıaqy jas talanttarǵa beriledi. Mundaı ıgi bastamalar arqyly qala jastaryn shyǵarmashylyq pen ónerge baýlyǵymyz keledi, – dedi uıymdastyrý alqasynyń múshesi Aqjan Qumar.
Bıylǵy Balalar jyly aıasynda aldyn ala jarıalanǵan «Mánerlep oqý», «Balalar sýretteri», «Jas sýretshi» jáne «Florıst jumysy» nomınasıalary boıynsha jalpy kólemi 400-den astam ótinim túsken. Atalmysh joba aıasyndaǵy baıqaý Almaty qalasynyń joǵary jáne arnaýly bilim berý uıymdarynyń stýdentteri men orta bilim berý uıymdarynyń oqýshylary, sondaı-aq, kásibı florıster arasynda ótkizildi. Aqtyq kezeńge 225 qatysýshy ótip, kásibı ádilqazylar saraptamasynan keıin merekelik shara barysynda marapattaldy.
– Bul bizdiń balalarymyz úshin óte erekshe festıvál boldy. Balalardy qoldap, olardyń shyǵarmashylyq qabiletterin jetildirýge, ónerge degen qyzyǵýshylyǵyn arttyrýǵa baǵyttalǵan mundaı sharalardyń ótýi kóńil qýantady. Baıqaýdyń uıymdastyrylý deńgeıi de óte jaqsy. Osyndaı ıgi issharany qolǵa alyp, ótkizip jatqan uıymdastyrýshylarǵa alǵys bildiremin, – dep Nazym Salamatova esimdi ata-ana aǵynan jaryldy.
«Mánerlep oqý» saıysynan bas júldeni jeńip alǵan jas ónerpaz Mádına Erlikqyzy da óziniń qýanyshyn jasyrmady:
– Men Muqaǵalı atamyzdyń «Kóktem» óleńin jáne óz shyǵarmashylyǵymdaǵy týyndylardy, jalpy alǵanda 8 óleń oqydym. Qanshama talantty balalar qatysqan baıqaýda ózimdi kórsete alǵanyma qýanyshtymyn, – dedi ol.
Festıváldiń taǵy bir ereksheligi – «Florıst jumysy» nomınasıasyna arnalǵan baıqaýdyń respýblıka boıynsha alǵash ret ótkizilýi boldy.
– «Florıst jumysy» atalǵan baıqaýymyz «Qyzǵaldaq» festıvali aıasynda elimizde tuńǵysh ret ótkizilip otyr. Bul úrdisti birdenbir birinshi bolyp bastap otyrǵan qalalyq ákimdiktiń «Rýhanı jańǵyrý» ortalyǵy dep aıta alamyz. Endi osyndaı merekelik sharalardy jyl saıyn ótkizý josparda bar, – dedi Aqjan Qumar.
Aıta ketken jón, festıválge qatysýshy florıster sahna janynan kórme jasap, sulýlyqqa qyzyqqan barlyq kórermenderdiń aldynda ózderiniń «Kóktem» taqyrybyndaǵy gúl shoqtaryn jınady. Ashyq aspan astyndaǵy «Qyzǵaldaq» festıvaline atalǵan nomınasıalardan bólek, birqatar shyǵarmashylyq óner sheberleri de qatysty. Atap aıtqanda, sándik qoldanbaly óner, tigin sheberleri, múmkindigi shekteýli erekshe ta- lantty balalar óz jumystaryn kópshilikke pash etýge múmkindik aldy. Atalǵan talanttardyń shalqar shabytyna shekteý qoımaı qoldaý kórsetilip, eńbekterin baǵalap, arnaıy syılyqtar tabystaldy. Olardyń qolynan shyqqan týyndylar sahna alańyn qorshaı, kórme retinde qoıyldy. Barlyq festıválge kelgen kórermender jas ónerpazdardyń sýretterin, qolóner týyndylaryn tamashalaı aldy. Sondaı-aq, shara qonaqtary úshin «Qyzǵaldaq festıvali – 2022» jazýy ornatylǵan fotozona jasaldy.
Jas ónerpazdar men baıqaýǵa qatysýshylar marapattalǵan soń, ashyq aspan astyndaǵy «Qyzǵaldaq» festıvali Gala-konsertke ulasty. Kórermenderge arnalǵan merekelik baǵdarlamada ulttyq naqyshtaǵy bı de, zamanaýı jandy daýystaǵy án de, sahnada turyp sýret salý óneri de, kishigirim sahnalyq qoıylymdar da boldy. Konsert barysynda baıqaý jeńimpazdary da óz ónerlerin kórsetti: óleń oqyp, osy sharaǵa arnaıy jazylǵan ánderin oryndady.
Kórmege qoıylǵan jumystar festıválge erekshe sán bergeni sózsiz. Shyǵarmashylyq týyndylardyń ishinde qarapaıym qalamnan bastap sýretshilerdiń arnaıy boıaýymen salynǵan sýretter jáne sándik qoldanbaly ónerde qoldanylatyn materıaldan jasalǵan eńbekter de boldy. Festıvál taqyryby «Qyzǵaldaq» bolǵan soń, barlyq qatysýshylar óz týyndylarynda kóktem beınesin, ásem gúlderdiń obrazyn kórsetýge tyrysqan. Jas sýretshilerdiń jumystarynda qyzyldy-jasyl gúl sýretteriniń kóp ekeni birden kózge túsedi. Alaıda, shyǵarmashylyq týyndylardyń ishinde ózgeden erek aıryqsha turǵan sýretter de boldy. Sondaı jumystardyń biri retinde 12 jasar Alım Dıvazovtyń «Ǵarysh qyzǵaldaqtary» dep atalǵan sýretin aıtýǵa bolady. Qylqalam sheberi ǵarysh keńistiginde san myńdaǵan juldyzdar men planetalardyń arasynda qalqyp júrgen qyzǵaldaqty salý arqyly kóktemniń tylsym, sıqyrly beınesin jetkizgen. Erekshe týyndylardyń qatarynda 15 jasar Gúlmıra Doskenovanyń «Kóktem sulýlyǵy» sýretin aıtpaı ketýge bolmaıdy. Jas sýretshi qyzǵaldaq toly taý bókterinde turǵan, basynda sorabasy bar (qyzdar kıetin taqıa tárizdes baskıim) qazaq qyzyn óte sheber beınelegen. Odan bólek, qyzǵaldaq tolǵan dalada váls bılegen ǵashyqtardyń sýreti, Almatynyń sulý ǵımarattaryn qorshaı ósken gúl sýretteri jáne ózge de týyndylar kórmege kórik berdi.
• taqyrypqa oraı
Qazaqy stıldegi gúl shoqtary
«Qyzǵaldaq» festıvaliniń «Florıst jumysy» baıqaýyna qatysýshylardyń biri Gúlzada Tymbaevadan florıst jumysynyń qyrysyry týraly suraǵan edik. Qysqasha suhbatty nazarlaryńyzǵa usynamyz.
– Festıvál men baıqaýdan qandaı áser aldyńyz?
– Almatyda óte keremet merekelik shara ótýde. Aınaladaǵy adamdardyń barlyǵy shattanyp, kóńildi júr. Naǵyz kóktemniń lebi seziledi. Búgingi baıqaýǵa qatysý úshin men arnaıy Gvardeıskıı qalasynan keldim. Festıvál aıasynda áskerı qalanyń atynan shyqqanyma qýanyshtymyn.
– Baıqaýǵa siz qandaı gúl shoǵyn usynasyz?
– Almaty úlken qala bolǵan soń, bul jerde eýropalyq stılde bezendirilgen úlken gúl shoqtary tanymal. Ol búgingi saıysta da baıqalady. Sondaı-aq, florıst mamandyǵynda negizinen orys ne ózge ult ókilderi jumys isteıdi. Sheber qazaq florısterin sırek kezdestiresiz. Sondyqtan naryqta qazaqy stıldegi gúl shoqtaryn kóre bermeımiz. Osy sebepti, «Florıst jumysy» nomınasıasyna men qazaqtyń oıý-órnekterimen árlengen gúl shoqtaryn usynamyn. Óz jumysymda kóktem belgisi retinde qabyldanatyn gúlderdi – qyzǵaldaq, alstromerıa jáne hrızantemany qoldandym. Sharaǵa qatysyp jatqan jastarǵa osy týyndymdy kórsetý arqyly, qazaqy stıldegi gúl shoqtaryn tanymal etkim keledi. Ózimizdiń sulýlyǵymyz barda nege ony ózgeden izdeımiz?
– Florıst mamandyǵyna qalaı keldińiz?
– Gvardeıskıı áskerı qala bolǵan soń, ol jerde gúl de, gúl satatyn dúkender de bolǵan joq. Áskerı adamdar anda-mynda erkin shyǵa almaıdy. Sondyqtan jubaıym ekeýmiz qalada birinshi bolyp gúl dúkenin ashaıyq dep sheshtik. Ol úshin men arnaıy florıst mamandyǵy boıynsha oqý oqyp, tájirıbe aldym. Búgingi kúni jumys istep jatqanymyzǵa 3 jyl boldy. Almatyda da ekinshi gúl dúkenimizdi ashtyq. Almaty turǵyndary meılinshe úlken gúl shoqtaryn jaqsy kóredi, al áskerı adamdar gúldiń shaǵyn, jınaqy bolǵanyn qalaıdy.
– Kóktemgi kezde qandaı gúl shoqtary suranysqa ıe?
– Maýsymy qysqa bolǵandyqtan, kóktemniń basynda qyzǵaldaq joǵary suranysqa ıe bolady. Odan keıin alstromerıa jáne hrızantemany aıtýǵa bolady. Al roza gúliniń qaı kezde de trendten túspeıtini belgili ǵoı.
– Gúlzada hanym, suhbattasqanyńyz úshin kóp rahmet. Baıqaý men aldaǵy bastamalaryńyzǵa sáttilik tileımiz!
Suhbattasqan Dosbol ATAJAN