Depýtat Murat Ábenov pen Marat Bashımov qyz alyp qashýdy Qylmystyq kodekstiń 125 babyna birinshi eskertpe retinde qosýdy usynyp otyr, dep habarlaıdy aqshamnews.kz.
Olardyń áriptesi Abzal Quspan bul eskertpeniń qalaı paıda bolǵanyn jáne onyń jazasyn túsindirdi.
«Bul «Májbúrli túrde úılený» baby dep atalady. Qylmystyq kodekstiń 125-baby «adam urlaý» dep atalady. Sodan bólek 125-baptyń birinshi eskertýi retinde óz aldyna bólek qylmystyq quram retinde enip otyr», - deıdi Abzal Quspan.
Depýtattyń málimetinshe, Qazaqstan qyz alyp qashý babyn 1997 jyly qabyldanǵan Qylmystyq kodekste dekrımınalızasıalaǵan.
«1959 jyly Qazaq KSR Qylmystyq kodeksinde bul bap bolǵan. Ol Kodeks bizdiń tarıhymyzdaǵy eń turaqty Kodeks boldy. 1997 jylǵa deıin bul norma kúshinde boldy. 1997 jyly táýelsiz Qazaqstan óziniń alǵashqy Qylmystyq kodeksin qabyldaǵan kezde dekrımınalızasıa jasap, ol bapty qylmystyq kodeksten alyp tastaǵan bolatyn. 2015 jylǵy Kodekske de engen joq. Biraq bul joly engizýdiń qajettiligi týyndady. Óıtkeni, qoǵam tarapynan kóp ótinish aıtyldy. Byltyr Quryltaıda memleket basshysy da osyndaı usynys aıtqan bolatyn. Sodan keıin depýtat Marat Bashımov pen Murat Ábenov osyndaı usynys berdi», - dedi Abzal Quspan.
Eger qyz jigitti jaqsy kórip, óz erkimen birge «qashyp» ketse, onda qylmystyq jaza kózdelmeıdi.
«Bul baptyń ózara tanys-bilis, ózara kelisimmen alyp qashqanǵa esh qatysy joq. Bul jerde qyzdy óz erkinen tys, kúsh qoldanyp, alyp qashqanǵa baılanysty másele kózdelgen. Kez kelgen jaǵdaı aryz túsýi kerek. Ne qyzdyń ózi, ne qyzdyń ata-anasy, ne týystary, tipti jaǵdaıdy biletin adamdar aryz jaza alady»,- deıdi Quspan.
Usynylyp otyrǵan baptyń birinshi bóligi boıynsha – jeńil jaza;
Ekinshi bóligi boıynsha – aýyr jaza (bes jyldan kópke sottalý)
Úshinshi bóligi boıynsha – asa aýyr jaza (on jyldan kópke sottalý)