Eki kún buryn Baıan Alagózovanyń kúıeýi, kásipker Tursynǵalı Alagózov qyzmetkerlerine páter syılap, jurttyń yqylasyna bólendi. Jomart kásipkerdiń bul áreketi áleýmettik jelide keńinen tarap, kópshiliktiń jyly lebizine ıe boldy. Aqshamnews.kz tilshisi Atymtaı Jomart atanǵan Alagózovtiń baılyǵyna sholý jasady.
Qyzmetkerlerge 100 páter syılandy
Tanymal kásipker Tursynǵalı Alagózov uzaq jyl boıy eńbek etken 100 qyzmetkerine páter tartý etti. Bul azamattardyń 80 paıyzy – qarapaıym jumysshylar. Olardyń basym kópshiligi kompanıada 1998 jyldan beri eńbek etip keledi.
"Bul – aıaqasty qabyldanǵan sheshim emes. Jyldar boıy biz birge elge tanymal ónim shyǵardyq. Sizderdi qýantqym keldi. Bul – alǵysymnyń belgisi. Keıbireýler muny bıznestiń áleýmettik jaýapkershiligi deıdi, men úshin bul – júrek qalaýy", – dedi kásipker páter kiltin tabystaý rásiminde.
Eki kún buryn ótken kezdesýde qyzmetkerlerge kilt, sertıfıkat pen úıdiń qujaty berilgen.
Barynan aıyrylǵan kásipker bıznes-ımperıasyn qalaı qaıta qurdy?
Kursiv.media málimetinshe, Tursynǵalı Alagózov esimi kópshilikke 2016 jyly belgili bola bastady. Bıznesmen sol jyly prodúser Baıan Alagózovamen (ol kezde Esentaeva - esk.) nekelesip, otbasylyq ómiri qoǵam nazarynda jıi aıtyldy. Alaıda kásipkerlik joly sol kezeńnen keıin órbidi.
Alagózov kásipkerlikke erte jastan bet burǵan. 1998 jyly negizin qalaǵan kompanıasy búginde tanymal sýsyndarymen belgili. Bul bıznesti ol alǵashqy jubaıy Láısara Maratpen birge bastaǵan. Alaıda keıin ajyrasqan soń, kompanıaǵa qatysty daý týyp, sot prosesi alty jylǵa sozylǵan. Nátıjesinde kásipker bıznesin ýaqytsha joǵaltty.
2024 jyly uzaqqa sozylǵan sot isterinen keıin kompanıa qaıtadan Alagózovtyń atyna ótti. Qazir onyń jyldyq tabysy 41 mlrd teńge, 3000 adam eńbek etetin iri kásiporyn sanalady.
2023 jyly kásipker Shymkent syra zaýytyn 8 mlrd teńgege satyp aldy. 1970 jyly negizi qalanǵan bul zaýyt buǵan deıin túrli sebeptermen memleket menshigine ótken bolatyn.
Al 2024 jyly Alagózov un ónimderin shyǵaratyn kompanıany 11 mlrd teńgege ıelendi.
Bıyl Forbes Kazakhstan Alagózovty Qazaqstandaǵy eń baı 75 kásipker qataryna (61-oryn) engizip, dáýletin 130 mln dollar dep baǵalady.
Kásipker qazirgi jubaıy Baıan Maqsatqyzynyń áleýmettik bastamalaryna da qoldaý kórsetedi. Sonyń biri – turmystyq zorlyq-zombylyq kórgen áıelderge arnalǵan "Mama Klara" daǵdarys ortalyǵy. Bul ortalyqty qarjylandyrý Tursynǵalı Alagózovtyń jeke demeýshiligimen júzege asady.
Sonymen qatar, kúni keshe ótken "Altyn hanym" jobasynyń jeńimpazyna Alagózov kólik syılady.