"10 saǵattyq rejımde jumys isteımiz. Jalaqymyz oǵan tatymaıdy", - deıdi jumysshylar.
Jambyl oblysynda «Merki-Býrylbaıtal» tasjolynyń qurylysyn júrgizip jatqan qytaılyq kompanıanyń jumysshylary jalaqyny arttyrýdy talap etip, narazylyq bildirýde, dep habarlaıdy Almaty-akshamy.kz QazAqparatqa silteme jasap.
Narazy eńbekkerlerdiń aıtýynsha, sońǵy úsh jyl boıy qytaılyq kompanıa eń tómengi jalaqy tólep kelgen. Eńbek jaǵdaılaryn jaqsartýdy da talap etip otyrǵan 80-nen astam jumysshy jumysqa shyǵýdan bas tartqan.
«10 saǵattyq rejımde jumys isteımiz. Jalaqymyz oǵan tatymaıdy. Mundaı jaǵdaıǵa shydamaıtynymyzdy eki aıdan beri aıtyp júrmiz. Munda tipti arnaıy kıim de joq», - deıdi jumysshy Mergenbaı Dabylov áriptesteriniń atynan sóz alyp.
Respýblıkalyq mańyzy bar tasjoldyń bul bóligin qytaılyq «Sınsın» kompanıasy salyp jatyr. Qurylys jumystary 2019 jyly bastalǵan desek, munda qazir 200-den astam jergilikti turǵyn jumyspen qamtyǵan. Kompanıa ókili jumysshylardyń aılyǵy 60 jáne120 myń teńge aralyǵynda ekenin aıtady.
«Biz jobany 2017 jylǵy baǵamen aldyq. Qazir ózimiz de shyǵynǵa batyp jatyrmyz. Qurylys zattarynyń quny da eselep ósti. Sol sebepti jalaqyny kótere almaı otyrmyz», – degen «Sınsın» qurylys jáne damytý kompanıasy» JSHS bas ınjeneri Súan Isúan máseleni 3 kúnniń ishinde ózderiniń basshylyqtarymen aqyldasyp, kóretinderin jetkizdi.
Osyǵan oraı Jambyl oblysy ákiminiń orynbasary Nurjan Kalenderov kompanıa basshylyǵymen arnaıy kezdesken.
«Kompanıa basshylyǵy úsh kún ishinde qyzmetkerlerdiń jalaqysyn kóterý máselesi qaralatynyn aıtty», - deı kele, ol jumysshylardy sabyrlyqqa shaqyrdy.
Qazirgi tańda qurylys jumystary shamamen 90 paıyzǵa aıaqtalǵan. Keler jylǵa deıin tolyǵymen aıaqtalyp, kólik qozǵalysy ashylady dep kútilýde.