Sátbaev ýnıversıtetiniń Ó.A.Baıqońyrov atyndaǵyTaý-ken metalýrgıa ınstıtýtynda «Inovasıalyq tehnologıalar jáne jańa beıorganıkalyq materıaldar» bilim berý baǵdarlamasy boıynsha Qytaı Halyq Respýblıkasynan kelgen bes doktorant bilim alýda.
Súı Chjýanchjýan, Gao Lılı, Lú Szınszın, Go Sáohýn jáne Lı Szá «Hımıalyq prosester jáne ónerkásiptik ekologıa» kafedrasynda bilim alyp jatyr, dep habarlaıdy aqshamnews.kz Ǵylym jáne joǵary bilim mınıtrligine silteme jasap.
Jas ǵalymdar aǵyndy sýlardy tazartý úshin ınovasıalyq materıaldardy paıdalaný, nano- jáne kompozıttik materıaldardy, sondaı-aq ekologıa men óndiristegi zamanaýı tehnologıalardy zertteýlermen aınalysýda. Olar oqý men zertteý júrgizý úshin qolaıly jaǵdaı jasaǵany úshin jáne Qazaqstan, Qytaı, Malaızıa, Polsha jáne Ulybrıtanıadan kelgen jetekshi ǵalymdardyń basshylyǵymen jumys isteýge múmkindik bergeni úshin ýnıversıtetke alǵystaryn bildirdi.
- Qazaqstanǵa kelgenime bir aı ǵana bolsa da, biz kóptegen jańa dostar taýyp, ýaqytty qyzyqty ótkizdik. Keleshekte kómirtegi negizindegi materıaldardy sıntezdep, olardy energıa saqtaý júıeleriniń barlyq túrlerine qoldanýdy josparlap otyrmyn. Bizge qoldaý kórsetken top múshelerine alǵysym sheksiz, ásirese PhD doktorlary Qydyr Asqaruly men seriktesim Elrızaǵa rızashylyǵymdy bildiremin. Qytaı men Qazaqstan arasyndaǵy dostyǵymyz nyǵaıa bersin dep tileımin! - dedi Shandýn provınsıasynan kelgen 1-kýrs doktoranty Lú Szınszın.
Jas ǵalym qazaqstandyq jáne brıtandyq jetekshilerdiń basshylyǵymen «Elektrohımıalyq energıany saqtaý qurylǵylary úshin joǵary tıimdi elektrodtyq materıaldardy ázirleý» taqyrybyndaǵy dısertasıasyn ázirleýde.
Qytaıdan kelgen taǵy bir doktorant Súı Chjýanchjýan da «Inovasıalyq tehnologıalar jáne jańa beıorganıkalyq materıaldar» mamandyǵy boıynsha 1-kýrsta oqyp júr. Ol Sátbaev ýnıversıtetiniń profesory Azat Seıithan men Malaızıadan kelgen profesor Nur Nabıh Iýsýftyń jetekshiligimen «Nanomagnıttik seolıtti alý jáne onyń nanoplastıkteriniń adsorbsıalaý qasıetterin zertteý» taqyrybynda ǵylymı jumys júrgizýde.