Ulytaý oblysynda quny 500 mlrd-qa jýyq qos joba júzege asyrylmaq, dep habarlaıdy almaty-akshamy.kz Ulytaý oblystyq ákimdigine silteme jasap.
Onyń birinshisi Jańaarqa aýdanynda jylyna 3,4 mlrd. kılovatt energıa óndiretin jel energıa stansıasyn salý bolsa, ekinshisi Jezqazǵan qalasynda jel energıa stansıa munaralarynyń metal konstrýksıalaryn óndiretin zaýyttyń qurylysy. Iaǵnı, soǵylatyn stansıalar jartylaı óz ónimimizben qamtylmaq.
Ulytaý oblysynyń ákimi Berik Ábdiǵalıuly jobalar júzege asyrylǵannan keıin oblysta qosymsha 300-ge jýyq jumys orny ashylatynyn jetkizdi. Aıta keteıik, jobany iske qosý úshin Jańaarqa aýdanynda 20 myń gektar, al Jezqazǵandaǵy zaýyt qurylysy úshin 20 gektar jer telimi bólindi.
Osy maqsatta búgin qytaılyq ınvestor Sinohydro, TehnoGrýppServıs kompanıalary jáne Ulytaý oblysynyń ákimdigi arasynda úsh jaqty memorandýmǵa qol qoıyldy. Mańyzdy rásim barysynda josparlanǵan jobalardyń 2060 jylǵa deıin Qazaqstanda kómirqyshqyl gazynyń shyǵaryndylaryn azaıtýǵa jáne kómirtegi beıtaraptyǵyna qol jetkizýge baǵyttalǵany atap ótildi.
Memorandýmǵa qol qoıylǵannan keıin bolashaq zaýyt ornynda alǵashqy tas qalaý rásimi ótti.