Tıisti kelisimge eki eldiń Úkimeti Sıanda qol qoıǵan bolatyn
Búginnen bastap Qytaıǵa vızasyz rejım kúshine enedi, dep habarlady almaty-akshamy.kz.
Tıisti kelisimge eki eldiń Úkimeti Sıanda qol qoıǵan bolatyn. Bul kelisimge sáıkes, eki eldiń azamattary jeke ister, týrızm, emdeý, halyqaralyq tasymaldar, tranzıt, sondaı-aq iskerlik maqsattardy iske asyrý úshin vızalyq talaptardan bosatylady.
Bul rette azamattardyń eki memlekettiń aýmaǵynda bolý merzimi memlekettik shekarany kesip ótken sátten bastap 30 kúntizbelik kúnnen, al 180 kúntizbelik kún ishinde jıyntyq 90 kúntizbelik kúnnen aspaýǵa tıis.
Eger azamattarǵa 30 kúnnen artyq bolý qajet bolǵan jaǵdaıda tıisti sanattaǵy kirý vızasyn aldyn ala rásimdeý qajet. Vızasyz rejım jumysqa ornalasýǵa, oqýǵa jáne mısıonerlik qyzmetke ruqsat bermeıdi.