Ózendegi sý sońǵy 50 jyldaǵy rekordty deńgeıge jetti.
Qytaıdyń ońtústigindegi Gýandýn provınsıasynda tótenshe jaǵdaıdyń joǵary deńgeıi jarıalandy. Keıbir aýdandarda ózendegi sý sońǵy 50 jyldaǵy rekordty deńgeıge jetti, dep habarlady Almaty-akshamy.kz Bbc.com silteme jasap.
Sınhýa agenttiginiń deregi boıynsha, kelgen shyǵyn mólsheri 470 mıllıon ıýán nemese 70,2 mıllıon dollar bolǵan, 40 myńnan astam gektar egistik jer joylǵan.
Ózge de óńirlerde nóser tolastamaı tur. Eldiń ońtústigi men shyǵysyndaǵy 5 provınsıa men avtonomıalyq aýdan japa shekken. Qatty jaýǵan jańbyr men sý tasqyny kesirinen laı kóshkinderi júrdi. Qutqarýshylar kúni-túni tynbaı jumys istep jatyr. Jalpy osyndaı jaǵdaı jyl saıyn qaıtalanyp júr jáne mamandardyń pikirinshe ahýaldyń jaqsaratyn túri joq.
«Kóptegen zertteýler ystyq kúsheıe berip, úlken aýmaqqa taraıtynyn kórsetti. 2050 jylǵa deıin aptap ystyq kezeńderi bolatyn jerdiń aýdany tórt ese artýy múmkin. Sol kezge deıin nóser jaýatyn aýdan da eki ese artady. Klımattyń ózgerýine qaýip tónip tur, muny qazirdiń ózinde sezip turmyz», – dedi Memlekettik klımat ortalyǵynyń dırektory Chao Sınchen.
Aıta ketsek, bul qaterge tótep berý úshin Qytaıda alǵash ret 2035 jylǵa deıin klımattyń ózgerýine beıimdelýdiń ulttyq strategıasy jarıalandy.
