Zań jobasynda servıstik kompanıalar ınstıtýtyn qurý qarastyrylǵan.
Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine strestik aktıvter naryǵyn damytý máseleleri boıynsha ózgerister men tolyqtyrýlar engizý týraly» zańy qabyldandy, dep habarlaıdy Almaty-akshamy.kz.
«Strestik aktıvterdiń 4 toby bar. Osy oraıda tóleý merzimi 90 kúnnen asqan kredıtter 870 mlrd teńge somada, qaıta qurylymdalǵan kredıtter 936 mlrd teńge somada, óndirip alynǵan múlik 156 mlrd teńge somada jáne bankterdiń strestik aktıvterdi basqarý jónindegi enshiles uıymdarynyń aktıvteri 356 mlrd teńge somada qamtylǵan. Bankterdiń balansyn jumys istemeıtin kredıtterden memleket qarajatyn tartpaı tazartýdyń naryqtyq tetigin qurý mańyzdy. Bul turǵyda strestik aktıvterdiń ótimdi naryǵyn damytý qajet. Strestik aktıvter naryǵyn qurý úshin osy zań jobasy 4 zańǵa ózgerister men tolyqtyrýlar engizýdi kózdeıdi», - dedi M. Ábilqasymova.
Birinshiden, zań jobasynda strestik aktıvterdi avtorızasıalanǵan satyp alýshylardyń qoldanystaǵy tizimin jeke ınvestorlardy qosý arqyly keńeıtý kózdelgen.
«Qazirgi ýaqytta Bankter týraly zańnyń 36-1 babyna sáıkes, avtorızasıalanǵan satyp alýshylar tizimine ekinshi deńgeıdegi bankter, bankterdiń strestik aktıvterdi basqarý jónindegi enshiles uıymdary, Problemalyq kredıtter qory, kolektorlyq agenttikter jáne basqa da qarjy uıymdary kiredi. Bul rette, tizim keńeıtilip, bankterdiń jáne mıkroqarjy uıymdarynyń strestik aktıvterin jeke ınvestorlarǵa satý quqyǵy beriledi. Jeke ınvestorlarǵa zańdy tulǵalardyń jáne dara kásipkerlerdiń tek problemalyq qaryzdaryn satyp alýǵa ruqsat etiledi. Zań jobasynda qaryz alýshy – jeke tulǵalardyń quqyqtaryn qorǵaý úshin olardyń nesıelerin ınvestorlarǵa satý eskerilmegen», - dedi agenttik basshysy.
Ekinshiden, zań jobasynda servıstik kompanıalar ınstıtýtyn qurý qarastyrylǵan. Olar ınvestorlarǵa problemaly kredıtterge qyzmet kórsetý jáne basqarý qyzmetterin iske asyrady.
«Servıstik kompanıalardyń fýnksıalaryn tıisti tájirıbesi men quzyreti bar bankterdiń strestik aktıvterdi basqarý jónindegi enshiles uıymdaryna jáne kolektorlyq agenttikterge berý usynylady. Servıstik kompanıalar aktıvterdi senimgerlik túrde basqarady, óndirip alýdyń jeke strategıasyn ázirleıtin bolady jáne strestik aktıvterdiń ıelerine basqa da qyzmetter kórsetedi. Zań aıasyndaǵy deńgeıde servıstik kompanıalar úshin kapıtaldyń mólsheri, naryqtaǵy jumys tájirıbesi, minsiz iskerlik bedeliniń bolýy sıaqty joǵary talaptar belgilenetin bolady. Agenttik belgilengen talaptarǵa sáıkes keletin servıstik kompanıalardyń tizilimin júrgizip, olar týraly aqparatty óziniń ınternet-resýrsynda ornalastyrady. Bul qaryz alýshylardyń quqyqtaryn qorǵaýdyń qosymsha tetigin qamtamasyz etýge múmkindik beredi, sebebi atalǵan uıymdar Agenttiktiń retteý aıasyna jatady», - dedi M. Ábilqasymova.
«Zań jobasy óndirip alynǵan múliktiń, ıaǵnı banktiń menshigine ótken múliktiń bankterdiń jáne mıkroqarjy uıymdarynyń teńgeriminde bolýy úshin shekti merzimdi 3 jyl dep belgileýdi qarastyrady. Bul bankter men mıkroqarjy uıymdaryn strestik aktıvterdi ekonomıkalyq aınalymǵa jedel túrde tartýǵa yntalandyrady», - dedi ol.