Úıden shyqpaýǵa keńes berildi
Beısenbide Chendý qalasynyń (Qytaıdyń ońtústik-batysyndaǵy Sychýan provınsıasynyń ákimshilik ortalyǵy) bıligi qatań lokdaýn engizdi, dep habarlaıdy Almaty-akshamy.kz QazAqparatqa silteme jasap. Qytaılyq megapolıs bıliginiń habarlamasyna sáıkes, jergilikti ýaqyt boıynsha saǵat 18:00-den bastap Chendý qalasynyń turǵyndaryna úıden shyqpaýǵa keńes beriledi.
Sonymen qatar, COVID-19-ǵa tapsyrǵan PTR testiniń nátıjesi teris bolsa, otbasy músheleriniń bireýine kúnine bir ret azyq-túlik alý úshin dalaǵa shyǵýǵa ruqsat etiledi.
Kásiporyndardyń jumys berýshileri qaladaǵy epıdemıologıalyq jaǵdaıǵa baılanysty qyzmetkerlerin qashyqtan jumys isteý rejımine aýystyrǵany jón.
Tek aýyl sharýashylyǵy bazarlary, qajetti taýarlary bar dúkender, dárihanalar men aýrýhanalar ǵana jumys isteıdi.
Qoǵamdyq kólik qozǵalysy qysqarady.
Beısenbiden bastap 21 mıllıonǵa jýyq halqy bar Chendý qalasynyń barlyq turǵynyn jappaı PTR testileý naýqany bastalady.