Áleýmettik qorǵaý
Tamara Dúısenova QR Prezıdentiniń Qazaqstan halqyna Joldaýyn iske asyrý máseleleri boıynsha keńes ótkizdi, dep habarlaıdy Almaty-akshamy.kz.
QR Eńbek jáne halyqty áleýmettik qorǵaý mınıstri Tamara Dúısenova vıse-mınıstrler, QR EHÁQM qurylymdyq bólimsheleri, enshiles uıymdary men aýmaqtyq departamentteriniń basshylary, sondaı-aq jergilikti atqarýshy organdar ókilderiniń qatysýymen keńes ótkizdi, onyń barysynda Memleket basshysynyń Qazaqstan halqyna Joldaýynda aıtylǵan tapsyrmalaryn iske asyrý boıynsha naqty mindetter júkteldi.
Keńes basynda Mınıstr QR Prezıdenti Qasym-Jomart Toqaevtyń Qazaqstan halqyna Joldaýynda aıtylǵan bastamalarynyń áleýmettik mańyzdylyǵyn atap ótti.
«Memleket basshysy eń tómengi jalaqy deńgeıin 60 myńnan 70 myń teńgege deıin arttyrý týraly sheshim qabyldady. Bul 1,8 mln azamattyń tabysyna tikeleı áser etedi. Sonymen qatar, ol eń tómengi jalaqyny anyqtaýdyń jańa ádistemesin engizýdi tapsyrdy, bul onyń mólsherin kezeń-kezeńimen arttyrýǵa múmkindik beredi. ETJ-niń ulǵaıýy qazaqstandyqtardyń ál-aýqatyn arttyrýǵa oń áser etedi, óıtkeni bul kórsetkish Memlekettik áleýmettik saqtandyrý qorynan tólenetin áleýmettik tólemderdiń mólsherine de áser etedi. Tıisti qurylymdyq bólimshelerge dınamıkalyq tásildemege negizdelgen jáne negizgi ekonomıkalyq kórsetkishterdi eskeretin ETJ aıqyndaý ádistemesin ázirleýge kirisýdi tapsyramyn», – dedi Tamara Dúısenova.
Mınıstr zeınetaqy júıesiniń tıimdiligin arttyrýǵa, balaly otbasylar men jumysynan aıyrylǵan azamattardy áleýmettik qoldaý sharalaryn jaqsartýǵa baılanysty tapsyrmalardyń, sondaı-aq jastardyń kásipkerlik bastamalarynyń mańyzdylyǵyn atap ótti.
Atap aıtqanda, Memleket basshysy eń tómengi bazalyq zeınetaqy mólsherin eń tómengi kúnkóris deńgeıiniń 70% deıin, al eń joǵary zeınetaqy mólsherin 120% deıin jetkizýdi tapsyrdy.
Buǵan deıin qabyldanǵan sheshimdermen birge bul 2025 jylǵa qaraı jıyntyq zeınetaqyny orta eseppen 27% ulǵaıtýǵa múmkindik beredi.
Keń aýqymdy áleýmettik suranysty eskere otyryp, Prezıdent 2028 jylǵa deıin áıelderdiń zeınetke shyǵý jasyn 61 jas deńgeıinde belgileýdi tapsyrdy.
Sondaı-aq, Memleket basshysy 2023 jylǵy 1 qańtardan bastap bala kútimi boıynsha tólemder kezeńin bir jarym jasqa deıin ulǵaıtýdy, al áleýmettik saqtandyrý júıesine qatysýshylar úshin jumysynan aıyrylý boıynsha tólemder mólsherin ortasha aılyq tabystyń 45% deıin arttyrýdy tapsyrdy.
Prezıdent sondaı-aq kelesi jyly túrli jumyspen qamtý sharalarymen 100 myńǵa jýyq jas qamtylatynyn aıtty. Jastar kásipkerligin qoldaý úshin jyldyq 2,5% - ben jeńildetilgen shaǵyn nesıe berýdiń jeke tetigi iske qosylady.
«Memleket basshysynyń bul tapsyrmalary 2023 jylǵy 1 qańtardan bastap iske asyrylýy tıis. Sondyqtan Mınıstrliktiń tıisti qurylymdyq bólimshelerine, memlekettik áleýmettik saqtandyrý qory men Eńbek resýrstaryn damytý ortalyǵyna qysqa merzimde barlyq qajetti esepterdi júrgizip, NQA men zańnamaǵa tıisti ózgerister engizýdi tapsyramyn. Jergilikti atqarýshy organdardan Prezıdenttiń tapsyrmalaryn iske asyrý barysy týraly aqparattyq-túsindirý jumysyna belsendi qosylýdy suraımyn», – dep atap ótti Tamara Dúısenova.
Keńes sońynda Mınıstr Memleket basshysynyń tapsyrmalaryn eskere otyryp, QR Áleýmettik kodeksiniń jobasyn pysyqtaýdy jáne jaqyn arada ony ashyq NQA portalynda ornalastyrýdy tapsyrdy.