Bılik 60 myńǵa jýyq adamdy úılerinen kóshirdi. 11 adam iz-túzsiz joǵalǵan.
Qytaıda birneshe kúnnen beri tolassyz jaýǵan nóser jaýyn saldarynan halqy eń kóp Gýandýn provınsıasynda qatty sý tasqyny boldy, dep habarlaıdy VVS.
Bılik 60 myńǵa jýyq adamdy úılerinen kóshirdi. 11 adam iz-tússiz joǵalyp ketti, ázirge zardap shekkender týraly málimet joq.
Sheneýnikterdiń aıtýynsha, birneshe iri ózen arnasynan asyp ketken. Úkimet sýdyń «qaýipti deńgeıde kóterilýin» muqıat qadaǵalap otyr. Gýandýnnyń soltústigindegi bir ózendegi sý deńgeıi 22 sáýirde tańerteń 100 jylda bir ret bolatyn eń joǵary deńgeıge jetýi múmkin, biraq túske deıin sharyqtaý shegine jetken joq.
Provınsıanyń astanasy Gýanchjoý, sondaı-aq shaǵyn Shaogýan jáne Heıýan qalalary qatty zardap shekkenderdiń biri boldy. Provınsıa boıynsha demalys kúnderi shamamen 1,16 mıllıon úı elektr qýatyn joǵaltty, biraq 21 sáýir kúni keshke olardyń 80% elektr qýaty qalpyna keltirildi.
Buǵan qosa, tolassyz jaýǵan jańbyr Gýanchjoýdaǵy Baıýn halyqaralyq áýejaıynda reısterdiń toqtatylýyna jáne keshigýine, sondaı-aq birneshe qalada mektepterdiń jabylýyna ákeldi. Provınsıada ondaǵan úı qırady nemese qatty zaqymdandy. Bıliktiń málimetinshe, tikeleı ekonomıkalyq shyǵyn shamamen 140,6 mıllıon ıýán (shamamen 8,8 mıllıard teńge) boldy.
Oqı otyryńyz: Azıany klımat ózgerýi qaýpinen qalaı qutqarýǵa bolady?
Qytaıdyń meteorologıalyq qyzmeti Gýandýn men kórshiles Fýszán provınsıasynyń jaǵalaý aımaqtarynda nóser jańbyr kem degende 23 sáýirge deıin jalǵasady dep eskertti.