Subaru Kazakhstan JSHS konteınerleri Qytaı aýmaǵynda 5 aı turyp qalǵan.
Kásipkerlerden Qytaıda turyp qalǵan konteınerlerge qatysty shaǵymdar 2020 jyldan bastap túsip jatyr, dep habarlaıdy Almaty-akshamy.kz «Atameken» ulttyq kásipkerler palatasyna silteme jasap.
Byltyrdan beri Qytaıda turyp qalǵan qazaqstandyq 1300-ge jýyq konteıner Qazaqstanǵa kelip, ári qaraı bıznesmenderdiń kelisimsharttyq mindettemelerine sáıkes basqa elderge bet aldy.
«Atameken» ulttyq kásipkerler palatasynyń dereginshe, búginde Qytaı 45 konteınerdi Lánúngan portynan shyǵarý jónindegi josparǵa qosty, taǵy 96 konteıner Qazaqstan shekarasyna jol tartty. Subaru Kazakhstan JSHS konteınerleri Qytaı aýmaǵynda 5 aı turyp qalǵan. Jaqyn kúnderi konteınerler Qazaqstanǵa jetti. Júkterdiń keshigýi kompanıa úshin qosymsha shyǵyn boldy.
«Kompanıamyz sapaly bólshekterdi Japonıadan satyp alady. Qytaımen shekarada bólshekterdiń turyp qalýyna baılanysty qarjylaı shyǵyndar ósti. Bul jaıt tehnıkanyń bastapqy qunyna teris áser etedi. Sonymen qatar biz Subaru-dyń resmı dıstrıbútorymyz jáne zaýyttan kepildik beremiz. Demek, qosalqy bólshekterdi jetkizýdegi kez kelgen kidiris klıentterimizdi kútýge, al bizdi olardyń aldyndaǵy mindettemelerimizdi buzýǵa májbúr etedi», – dedi Subaru Kazakhstan JSHS dırektory Aqylbek Anarbaev.
«Atameken» UKP málimetinshe, Qytaıdan júk tıelgen konteınerler elge kele jatyr. Ulttyq palata osy turyp qalǵan júkter týraly derekterdi 2021-2022 jyldar aralyǵynda salalyq vedomstvolar men «Qazaqstan temir joly» kompanıasyna habarlaǵan.
«Qazir biz oń dınamıkany baıqap otyrmyz. Ulttyq palata 1342 konteıner týraly derektermen taǵy bir tizimdi jiberdi. Sol tizimdegi turyp qalý merzimi tym uzaryp ketken. Shekarada 1-den 4-ke deıin konteıneri bar shaǵyn jáne orta bıznes sýbektileriniń júkteri 6-7 aıdan asa ýaqyt turyp qaldy. Bul tizim boıynsha ilgerileýdi kórip otyrmyz», – dep atap ótti «Atameken» UKP tóralqa tóraǵasy Raıymbek Batalov.