Úkimettiń aldyndaǵy kúrdeli mindettiń biri – ınflásıany ustap turý.
Bul týraly búgin Úkimet otyrysynda QR Premer-Mınıstri Álıhan Smaıylov aıtty, dep habarlaıdy Almaty-akshamy.kz
«Jalpy alǵanda, elimizdiń áleýmettik-ekonomıkalyq damýyna shekteý sharalarynyń áserin barynsha azaıta aldyq. Bul jumysty jalǵastyrýymyz kerek. Bizben kórshiles elderdiń ekonomıkasyna sanksıalardyń yqpaly kúsheıe tústi. Sonymen qatar, Úkimettiń aldyndaǵy kúrdeli mindettiń biri – ınflásıany ustap turý. Naýryz aıynyń qorytyndysy boıynsha elimizdegi jyldyq ınflásıanyń deńgeıi 12 paıyzdy qurady», -dedi Úkimet basshysy.
Álıhan Smaıylovtyń paıymynsha, oǵan birinshi kezekte, bizdiń saýda jasap otyrǵan seriktes elderdegi ınflásıanyń ósýi men álemdik azyq-túliktiń qymbattaýy tikeleı áser etken.
«Birikken Ulttar Uıymy azyq-túlik jáne aýyl sharýashylyǵy uıymynyń málimeti boıynsha bıylǵy naýryz aıyndaǵy azyq-túlik baǵasynyń álemdik ındeksi 159 paıyzdyq tarmaqqa deıin ósip, sońǵy 30 jylda bolmaǵan eń joǵary deńgeıge jetken. Álemde negizinen dándi daqyldarǵa, ósimdik maıyna, qantqa, et pen sút ónimderine baǵa ósip ketken. Bul bizdiń naryqqa da tikeleı áser etip otyr», - dedi ol.
Osy oraıda Úkimet basshysy el Prezıdentiniń tapsyrmasy boıynsha 2022-2024 jyldarǵa arnalǵan ınflásıa deńgeıin baqylaý jáne tómendetý boıynsha keshendi sharalar iske asyrylyp jatqanyn aıtty.
«Inflásıany ustap turý úshin qajetti quraldar bar. Memlekettik organdar men ákimdikter olardy tıimdi paıdalanyp, bul máseleni erekshe nazarda ustaýy tıis», - dedi Premer-Mınıstr.