Shaharda koronavırýstyń qandaı shtamy taralyp jatqany belgisiz
Qytaıdyń Sıan qalasynda (Shensı provınsıasy) keshe koronavırýs juqtyrýdyń 158 deregi tirkeldi, dep habarlaıdy Almaty-akshamy.kz inbusiness.kz portalyna silteme jasap.
QHR Densaýlyq saqtaý memlekettik komıtetiniń málimetinshe, 158 derektiń 155-i jańa bolyp sanalady. Turǵyndar vırýsty shetelde emes, elde juqtyrǵan.
«Qalada qatań karantın shekteýiniń engizilgenine qaramastan koronıvırýs juqtyrý deregi ósip jatyr: beısenbide – 49 derek, jumada – 75 derek», - dep jazylǵan habarlamada.
Qytaı bıligi Sıanda koronavırýstyń taralýyn boldyrmaý úshin ishki reısterdi toqtatqan, poıyzdar men qalaaralyq kólikterdiń júrýine shekteý qoıǵan. Turǵyndar shuǵyl jaǵdaı bolmasa, úıden shyqpaýy kerek. Azyq-túlik pen qajet taýarlardy satyp alú úshin otbasynyń bir múshesi ǵana dúkenge bara alady. Turǵyndarǵa eki kúnde bir ret dúkenge barýǵa ruqsat berilgen.
QHR Densaýlyq saqtaý memlekettik komıteti taratqan habarlamada Sıanda koronavırýstyń qandaı shtamy taralyp jatqany jazylmaǵan.
Búginde Qytaıda omıkron shtamyn juqtyrýdyń 7 deregi tirkelgen: 4 derek Gýanchjoý qalasynda (Gýandýn provınsıasy), ekeýi Chansha qalasynda (Hýnan provınsıasy) jáne bir derek Tánszın qalasynda.
Tártipti tekserý jónindegi ortalyq komısıa Sıanda koronıvırýstyń aldyn alý jáne baqylaý salasynda durys jumys isteı almaǵany úshin 26 sheneýniktiń jaýapqa tartylǵanyn habarlady.
Qytaı bıligi 2022 jylǵy 4-20 aqpanyna josparlanǵan Beıjińdegi qysqy Olımpıada oıyndarynyń jaqyndaýyna baılanysty COVID-19 vırýsynyń taralýyna alańdap otyr.