«Qonaev» ÁKK basshylyǵy ekonomıkanyń túrli salalarynda jumys isteıtin jetekshi qytaılyq kompanıalarmen kezdesti, dep habarlaıdy aqshamnews.kz
Búginde Qazaqstanda aýyl sharýashylyǵy tehnıkasyna degen suranys kúnnen-kúnge artýda. Sarapshylardyń pikirinshe, fermerler arasynda eń kóp suranysqa ıe tehnıkanyń biri – túrli qýattylyqtaǵy traktorlar. Qazirgi kezde elimizdiń aýyl sharýashylyǵy tehnıkasy parkinde shamamen 150 myń traktor men 40 myń kombaın bar, biraq olardyń tozý deńgeıi 80%-ǵa jetken.
Almaty oblysy aýyl sharýashylyǵy salasynda jetekshi óńirlerdiń biri. Munda kókónis, jemis, kartop, júgeri, soıa, kúrish sıaqty ártúrli daqyldar óndiriledi. Oblysta aýyl sharýashylyǵyna arnalǵan 4,3 mıllıon gektar jer bar. Jaıylymdar 3,9 mıllıon gektardy, al egistik jerler 460 myń gektardy qamtıdy. Osyǵan baılanysty, Qazaqstandaǵy aýyl sharýashylyǵy tehnıkasy naryǵy aıtarlyqtaı ósý áleýetine ıe. Sarapshylar bolashaqta bul salada tehnıkaǵa degen suranystyń artýyn boljap otyr.
«Qonaev» Áleýmettik-kásipkerlik korporasıasy» AQ Almaty oblysynyń áleýmettik-ekonomıkalyq damýyna járdemdesýdi maqsat etedi. Naryq jaǵdaıyn eskere otyryp, ÁKK basshylyǵy ınvestısıalar tartý jáne uzaq merzimdi áriptestik qatynastar ornatý boıynsha jumystar júrgizedi. Qytaılyq seriktester Qazaqstanda, ásirese Almaty oblysynda jobalardy iske asyrýǵa qyzyǵýshylyq tanytty.
Sapar barysynda ÁKK ókilderi Chjenszán qalasynda aýyl sharýashylyǵy tehnıkasyn óndiretin FMWorld jáne Jiangsu Hongdou Energy Technology Co, Ltd kompanıalarynyń zaýyttaryn aralady. Zaýyttar az qýatty traktorlardan bastap qazirgi zamanǵy kombaındar men aýyl sharýashylyǵy drondaryna deıin shyǵarady. Qytaı tarapy Almaty oblysynda mashına-traktor zaýytyn salyp, óndiristi 80%-ǵa deıin jergilikti deńgeıde oqshaýlaý múmkindigin qarastyrýda.
«ÁKK bizdiń óńir turǵyndarynyń ál-aýqatyn jaqsartýǵa baǵyttalǵan memlekettik baǵdarlamalardy júzege asyrýda. Osy kezdesýde biz úshin Almaty oblysynda traktorlar men kombaındar óndirisin jolǵa qoıý óte mańyzdy boldy. Bul ónimniń ózindik qunyn tómendetip, azyq-túlik shyǵyndarynyń azaıýyna yqpal etedi», – dep atap ótti «Qonaev» ÁKK Basqarma Tóraǵasy Murat Ábdiǵulov.
Sonymen qatar, Almaty oblysynda jańa turǵyn úı salý jáne eski úılerdi jańartý qajettigi týyndap otyr. Shanhaı qalasynda CNECC (China Nuclear Engineering Construction Corporation) kompanıasynyń ókilderimen kezdesý ótkizilip, Almaty oblysyndaǵy qurylys jobalary boıynsha yntymaqtastyq máseleleri talqylandy. Kompanıanyń iri qurylys jáne ınfraqurylym nysandaryn júzege asyrýdaǵy tájirıbesi mol. Bul saladaǵy seriktestik turǵyn úı qorynyń jańǵyrtylýyna, turǵyndardyń ómir sapasyn arttyrýǵa jáne zamanaýı ınfraqurylym qurýǵa negiz bolmaq.
Kelissózder nátıjesinde, ÁKK men Qytaı kompanıalary arasynda ózara túsinistik jáne yntymaqtastyq týraly memorandýmdarǵa qol qoıyldy. Qujattarǵa qol qoıý óńirdiń turaqty damýyn qamtamasyz etetin uzaq merzimdi seriktestikke bastama beredi.