Almaty ákimi Erbolat Dosaev Naýryzbaı aýdanyndaǵy jumys sapary barysynda áleýmettik osal toptar (HÁOT) men jumys isteıtin jastarǵa jalǵa beriletin páterler qarastyrylǵan jańa «Alem City 3» turǵyn úı keshenin aralap kórdi, dep habarlaıdy aqshamnews.kz
Sapar barysynda Erbolat Dosaev múmkindigi shekteýli azamattar úshin qolaıly orta qurýdyń mańyzdylyǵyn atap, turǵyn úılerge pandýstar ornatýdy tapsyrdy. Sonymen qatar, jańa úılerdi ýaqytyly ınjenerlik jelilerge qosyp, jylý jáne sýmen jabdyqtaý júıeleriniń turaqty jumysyn qamtamasyz etýge tapsyrma berdi.
Memlekettik turǵyn úımen qamtamasyz etý baǵdarlamany júzege asyrý aıasynda 2022-2023 jyldary komýnaldyq turǵyn úı qoryna HÁOT pen jumys isteıtin jastarǵa bólinetin 4100 páter berildi. 2024 jyldyń sońyna deıin qosymsha 3150 páter satyp alý josparlanyp otyr, onyń 2100-i HÁOT-qa, al 1050-i jumys isteıtin jastarǵa arnalǵan.
Jumys isteıtin jastarǵa úsh jylǵa deıingi merzimge aıyna 7-15 myń teńge aralyǵynda tólemmen jalǵa berý qarastyrylǵan, alaıda uzartý nemese satyp alý múmkindigi joq. Osy kezeńde jalǵa alýshy jastar keıinnen ekinshi deńgeıli bankter arqyly ıpotekaǵa turǵyn úı satyp alý úshin depozıtte qarajat jınaýy kerek.
Bıylǵy 10 aıda 4828 azamat turǵyn úımen qamtamasyz etildi, olardyń ishinde: 1655-i kezekte turǵandar úshin komýnaldyq turǵyn úı qorynan jaldamaly baspana alǵandar; 2100-i jumys isteıtin jastar úshin satyp alý quqyǵynsyz jalǵa beriletin baspana alǵandar; 226-y jyldyq 2-5% jeńildetilgen nesıe beretin baǵdarlama arqyly baspana alǵandar; 847-y «Almaty jastary» baǵdarlamasy aıasynda úıli bolǵandar. Sondaı-aq, 187,3 mln teńge somasyna 160 turǵyn úı sertıfıkaty berildi.