Qaýly jobasy 26 sáýirge deıin qoǵam talqylaýynda bolady
«Ashyq NQA» portalynda Qazaqstan men Qytaı Halyq Úkimetteriniń arasyndaǵy vızalyq talaptardan ózara bosatý týraly kelisimge qol qoıý týraly qaýly jobasy jarıalandy, dep habarlaıdy Almaty-akshamy.kz QazAqparatqa silteme jasap.
Bul qujat Qazaqstan azamattarynyń Qytaı aýmaǵynda, Qytaı azamattarynyń Qazaqstan aýmaǵynda 30 kúnnen aspaıtyn merzimde vızasyz júrýine múmkindik berýdi kózdeıdi.
«Qosa berilip otyrǵan Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy vızalyq talaptardan ózara bosatý týraly kelisimniń jobasy maquldansyn», - delingen Qaýly jobasynda.
Atalmysh kelisimniń 1-babynda 30 kúndik vızasyz rejım qandaı maqsatpen qatynaıtyn azamattarǵa beriletini aıtylǵan.
«Ýaǵdalasýshy Taraptardyń biri memleketiniń azamattary osy Kelisimniń 2-babynda kórsetilgen jaramdy jol júrý qujattarynyń ıeleri jeke isterdi, týrızmdi, em qabyldaýdy, halyqaralyq tasymaldardy, tranzıttik, sondaı-aq iskerlik maqsattardy (kelisim-sharttar jasasý, kelissózder júrgizý, konsýltasıalyq qyzmetter kórsetý jáne basqa da iskerlik maqsattar) júzege asyrý maqsatymen ekinshi Ýaǵdalasýshy Tarap memleketiniń aýmaǵyna Memlekettik shekarany kesip ótken sátten bastap kúntizbelik 30 (otyz) kúnnen aspaıtyn merzimge, kúntizbelik 180 (júz seksen) kún ishinde jıyntyǵynda kúntizbelik 90 (toqsan) kúnnen aspaıtyn bir márte nemese kóp márte kelý, ketý, ýaqytsha bolý úshin vızalyq talaptardan bosatylady», - dep jazylǵan kelisim mátininde.
Iaǵnı, saparlaýshy azamattar 30 kúndik vızasyz rejım aıasynda ekinshi elge 180 kúnniń ishinde 90 kúnnen artyq bola almaıdy.
Qaýly mátinindegi málimet boıynsha, 18-19 mamyrda bul kelisimge Qazaqstan Prezıdentiniń Qytaı Halyq Respýblıkasyna Memlekettik sapar barysynda qol qoıylmaq. Qujatqa QR Premer-Mınıstriniń orynbasary – Syrtqy ister mınıstri Murat Nurtileý men Qytaı Halyq Respýblıkasy Syrtqy ister mınıstri Sın Gan qol qoıady dep josparlanǵan.
Qaýly jobasy 26 sáýirge deıin qoǵam talqylaýynda bolady.