Qytaıda koronavırýstan 5241 adam qaıtys bolǵan.
Beıjiń aldaǵy eki aptada COVID-19 ınfeksıasyn juqtyrý oqıǵalarynyń aýyr jaǵdaılaryna tap bolady. Muny sheteldik jáne jergilikti respıratorlyq sarapshylar boljap otyr, dep habarlaıdy Almaty-akshamy.kz Inbusiness.kz cilteme jasap.
Al, Qytaıdyń kútpegen jerden asa qatal antıvırýstyq saıasattan bas tartýynyń álemdik ekonomıkaǵa yqtımal zardaptary men saldarlary qandaı bolýy múmkin? Qazir bul máseleler de úlken alańdaýshylyqqa sebepshi.
Aýqymdy narazylyqtardan keıin, 1, 4 mlrd halqy bar el osy aıda óziniń "nóldik-COVID" rejımin buza bastady. Bul saıasat QHR-dy úlken ekonomıkalyq jáne psıhologıalyq shyǵyndarǵa ushyratsa da, vırýstyń taralýyn úsh jyl boıy aıtarlyqtaı tejep keldi.
Degenmen, karantındik shekteýlerdiń kenetten bosańsýy Qytaıda koronavırýsqa shaldyǵý faktileriniń kúrt ósýimen tuspa-tus kelip otyr. Keıbir sarapshylardyń aıtýynsha, Qytaıda osy indetten kelesi jyly mıllıonnan astam adam qaıtys bolýy múmkin.
Pandemıa bastalǵaly Qytaıda koronavırýstan 5241 adam qaıtys bolǵan. Global Times gazeti respıratorlyq sarapshylar men epıdemıologtarǵa silteme jasap habarlaǵandaı, bul san taıaýda kúrt ósýi ǵajap emes.
"Biz tez áreket etip, resýrstarymyz ben klınıkalardy jaǵdaıy aýyr naýqastardy emdeýge shuǵyl daıyndaýymyz kerek", - deıdi Beıjiń ýnıversıtetiniń birinshi aýrýhanasynyń respıratorlyq mamany Van Gýanfa atalǵan basylymǵa bergen suhbatynda.