«Ventán» zerthanalyq modýlimen ǵaryshqa jetkizilgen kúrishtiń eksperımenttik tuqymy bir aı ótken sońy sátti ósip shyqty. Bul jaıynda Qytaı ǵylym akademıasy jarıalaǵan habarlamada aıtylǵan, dep habarlaıdy Almaty-akshamy.kz Inform.kz-ke silteme jasap.
Qytaı Ǵylym akademıasynyń (QǴA) ǵaryshta ósimdikterdi ósirý baǵdarlamasynyń jetekshisi Chjen Hýısúnniń aıtýynsha, qazirgi ýaqytta kúrish tuqymyn ósirý sátti bastaldy. Atap aıtqanda, qysqa dándi kúrish 4-5 sm bolyp ósip shyqty. Taıkonavtar (Qytaıda ǵaryshkerlerdi osylaı ataıdy) úlgilerdi jınaıdy, sodan keıin muzdatyp, saqtaıdy, odan keıin olardy saraptama jasaý úshin Jerge alyp keledi.
Olar zertteýdiń arqasynda álemde alǵash ret ǵaryshtyq mıkrogravıtasıa jaǵdaıynda «tuqymnan tuqymǵa deıin» ómir boıy kúrish ósirý eksperımenti júzege asyrylady degen úmit bildirdi.
QǴA habarlamasynda alys ǵaryshty ıgerý damyǵan saıyn, tipti bolashaqta Marsqa qonýdy eskergende Jerden jetkiziletin azyq-túlikke ǵana sený múmkin emes ekendigi aıtylǵan. Ǵaryshtyq saıahattyń uzaq merzimdi qajettilikterin qanaǵattandyrý úshin ǵaryshta azyq-túlik ósirý máselesin sheshý qajet.
«Ǵaryshtyq daqyldardyń bolashaq óndirisi tolyǵymen oqshaýlanǵan jasandy ortada júzege asyrylýy kerek. Ǵaryshta ósiriletin daqyldar joǵary ónimdilik pen sapa, joǵary tıimdilik jáne energıany az tutyný talaptaryna sáıkes kelýi qajet», - dedi Chjen Hýısún.
Budan buryn habarlanǵandaı, shilde aıynda alǵashqy «Ventán» zerthanalyq modýli paıdalanýǵa berildi. Qazan aıynda «Mantán» ekinshi modýli iske qosylady degen jospar bar. Sodan keıin Qytaıdyń Tángýn orbıtalyq stansasynyń («Aspan saraıy») qurylysy aıaqtalady. Ol T-tárizdi bolady.
Sońǵy jyldary Qytaı bıligi Ulttyq ǵarysh baǵdarlamasyn júıeli túrde damytyp keledi. Qytaı ǵalymdary QHR-dyń birinshi ǵaryshtyq orbıtalyq stansasynyń qurylysyn osy jyldyń sońynda aıaqtaýmen qatar, Aı men Marsty ıgerýdi de basty nazarda ustap otyr.