2013 jyldan beri 10 jyl ishinde Alashankoý (Qytaı) – Dostyq (Qazaqstan) shekaralyq ótkeli arqyly 36 600-den astam poıyz, al 2016 jyldan beri Qorǵas qurǵaq porty arqyly Eýropa elderine jáne qarama-qarsy baǵytta júkteri bar 33 400-den astam poıyz ótti
Búgingi tańda eki shekaralyq ótkel de 200 sanattaǵy júkteri bar Qytaı-Eýropa jáne Eýropa-Qytaı poıyzdarynyń jalpy sanynyń jartysynan kóbi ótedi, dep habarlaıdy Almaty-akshamy.kz Rail-news.kz-ke silteme jasap.
Qytaıdyń ónerkásip ortalyqtaryn Eýropanyń 25 jáne 18 elindegi saýda seriktesterimen baılanystyratyn «Alashankoý-Dostyq» shekara ótkeli arqyly 115 baǵyt, al Qorǵas-Altynkól arqyly 80 baǵyt bar.
Transshekaralyq tasymaldaýdyń tıimdiligin arttyrý maqsatynda Qytaı shekaralyq stansıalardyń ótkizý qabiletin arttyrý sharalarymen qatar tehnologıalyq prosesterdi ońtaılandyrýda. Nátıjesinde 2023 jylǵa qaraı osy shekara ótkelderinde bir poıyzdy óńdeý ýaqyty 12 saǵattan 6–8 saǵatqa deıin qysqartyldy. Sonymen qatar Qazaqstan óziniń tranzıttik áleýetin arttyrýǵa baǵyttalǵan birqatar jobalardy júzege asyrýda, onyń ishinde Qytaımen ótkeldegi shekaralyq ótkizý qabiletin de arttyrýda. Úshinshi Baqty-CHýgýchak temirjol ótkeli salynýda, ol Qytaı-Qazaqstan shekarasyndaǵy poıyz ótkizý pýnktteriniń jalpy óńdeý qýatyn jylyna 28-den 48 mıllıon tonnaǵa deıin ulǵaıtýǵa múmkindik beredi.
Aıta ketsek, Memleket basshysy Qasym-Jomart Toqaev kólik-logıstıkalyq áleýetti damytýdy Úkimet jumysynyń negizgi basymdyqtarynyń biri retinde belgilegen bolatyn.
«Qazir álemde jańa ekonomıkalyq keńistik qalyptasyp jatyr. Qytaıdan Eýropaǵa, Reseıge, Ortalyq Azıaǵa jáne osy aımaqtardan Qytaıǵa jiberiletin taýar kólemi aıtarlyqtaı kóbeıedi degen boljam bar. Qazaqstan soltústik pen ońtústikti, batys pen shyǵysty baılanystyratyn jahandyq jolaıryqta ornalasqan. Bul bizdiń elimizge zor múmkindik berip otyr. Sondyqtan kólik-logıstıka salasy ekonomıkamyzdy alǵa bastaıtyn basty kúshtiń birine aınalýǵa tıis», — dedi el Prezıdenti halyqqa Joldaýynda.
Elimiz Qytaıdan Eýropaǵa bet alǵan júk tasqynyn arttyrý baǵytynda ınfraqurylymdy jaqsartýǵa basymdyq berip otyr. Atap aıtqanda, 2023 jyldyń qarasha aıynda Almaty torabyn aınalyp ótetin (74 km) jáne Darbaza – Maqtaaral (152 km) temirjol jelileriniń qurylysy bastaldy. Birinshisi júkterdi jetkizý merzimin 24 saǵatqa qysqartyp, Almaty temirjol torabyn 40%-ǵa jeńildetse, ekinshisi Ortalyq Azıa baǵytynda ótkizý qabiletin 10 mln tonnaǵa arttyrady.
Budan bólek, jeltoqsanda uzyndyǵy 272 shaqyrym bolatyn Baqty – Aıagóz temirjol jelisiniń qurylysy bastaldy. Bul jobany júzege asyrý Qazaqstan men Qytaı arasyndaǵy júk aınalymyn qosymsha 20 mln tonnaǵa arttyrýǵa múmkindik beredi.
Jalpy aldaǵy úsh jylda respýblıkada 1 300 shaqyrymnan astam jańa temirjol salynady dep josparlanyp otyr.