Bıyl Almaly aýdany boıynsha jalpy uzyndyǵy 25 shaqyrym bolatyn 17 kóshege ortasha jóndeý josparlanǵan.
Onyń jalpy uzyndyǵy 7,4 shaqyrym, 3 kóshe boıynsha: Abaı dańǵyly, Ýdarnaıa kóshesi jáne Amangeldi kóshesinde jumystar aıaqtaldy, dep habarlaıdy Almaty-akshamy.kz.
Bul týraly Almaty ákimi Erbolat Dosaev Almaly aýdany turǵyndarymen ótken kezdesýde aıtty.
Qyrkúıek aıynda jalpy uzyndyǵy 17,6 shaqyrym qalǵan 13 kóshe boıynsha jumystar aıaqtalady.
«Osy jyldyń qyrkúıek aıynyń sońyna deıin Baıtursynov pen Dosmuhamedov kósheleriniń arasynda Áıteke bı kóshesiniń boıyndaǵy joldy uzartý aıaqtalady. Bul kósheni uzartý jobasy jaqyn mańdaǵy úılerdiń turǵyndarynyń pikirin eskere otyryp, qaıta qaralǵanyn atap ótkim keledi», - dedi qala basshysy E.Dosaev.
Jobaǵa sáıkes Áıteke bı kóshesiniń soltústik jaǵyndaǵy trotýar jol bóligi men №121a, 123, 123/1 úılerdiń arasynda ornalasqan. Sondaı-aq osy korıdorda elektr jelilerin shyǵarý trassasy ornalasqan. Jol jumystary barysynda turǵyndar keıinnen shlagbaýmdy bólshekteı otyryp, turaq pen balalar alańdaryn alyp tastaý arqyly trotýar salý sheshimmen kelispeıtinin aıtty. Qalalyq mobıldilik basqarmasy men aýdan ákimdiginiń turǵyndarmen talqylaýynan keıin balalar men shlagbaým qoıylǵan turaq alańdaryn qaldyra otyryp, trotýardyń jáne jol boıyna shyǵarylatyn elektr jelileriniń (aralas trotýar) ornalasýyn ózgertý týraly sheshim qabyldandy.
«Aýdan ákimdigi bıyl 46 myń m2 kóshe-jol jelisin aǵymdaǵy jóndeýdi josparlady, búgingi tańda 17 myń m2 astam jol tósemi qalpyna keltirildi jáne qazan aıynyń sońyna deıin taǵy 29 myń m2 jol jóndeletin bolady. Bıyl ortalyqsyzdandyrý aıasynda osy jumystarǵa aýdan ákimdigine 800 mln. teńge bóldik», - dedi E.Dosaev.
Aýdannyń trotýarlaryn jóndeýge erekshe kóńil bólinýde. Búgingi kúni 5 kóshe: Panfılov kóshesi (Abaı dańǵylynan Shevchenko kóshesine deıin), Dosmuhamedov kóshesi (Gogol kóshesinen 11 úıge deıin), Tórequlov kóshesi (Seıfýllın dańǵylynan «Almatym» turǵyn úı kesheniniń kireberisine deıin), Áýezov kóshesi (Qabanbaı batyr dańǵylynan Tóle bı kóshesine deıin) jáne Masanchı kóshesi (Jambyl kóshesinen Tóle bı kóshesine deıin) boıynsha 2,2 km trotýar jelisin ortasha jóndeý jumystary aıaqtaldy.
Osy jyldyń qazan aıynyń sońyna deıin taǵy 2 kóshe: jalpy uzyndyǵy 1 km Tóle bı kóshesi (Chokın kóshesinen Baızaqov kóshesine deıin) men Raıymbek dańǵyly (Mehanıcheskaıa kóshesinen Áýezov kóshesine deıin) boıynsha trotýarlardy retke keltiriledi.