Qyrǵyzdar da qyzǵa óz salýda aldaryna jan salmaıdy eken.
Kúni keshe Qyrǵyzstan prezıdenti Sadyr Japarov el halqynyń aldynda keshirim surady, dep habarlaıdy Almaty-akshamy.kz.
Oǵan sebep qyrǵyz prezıdentiniń inisiniń qyzy Lázzat Nurqojaevaǵa súıgen jigitiniń sóz salýy boldy.
«Qyzdy kim aıttyrmaıdy, qymyzdy kim ishpeıdi». Deıturǵanmen, Lázzat Nurqojaevaǵa Qyrǵyzstannyń Tótenshe jaǵdaılar mınıstrligine qarasty tikushaqty paıdalanyp jasalǵan usynystyń vıdeosy áleýmettik jelide jeldeı esip, tarap ketti.
Onyń tarap ketýine Nurqojoevanyń ózi sebepker boldy. Ol áleýmettik jelilerde beınerolık jarıalady, onda bolashaq kúıeý jigitpen birge Qyrǵyzstan TJM tikushaǵymen Bishkek mańyndaǵy shatqalǵa qalaı ushyp jetkeni kórsetilgen. Eldi shýlatqan kúıeý jigittiń usynysyn prezıdenttiń inisiniń qyzy qabyl alǵan. Jastardyń bul áreketi halyqtyń keri reaksıasyn týdyrdy.
«Memleket basshysynyń jaqyndary basqalarǵa úlgi bolýy kerek. Men ysyrapshyldyqty toqtatý kerek ekenin jıi qaıtalaımyn. Bolashaq kúıeý balam mundaı usynys jasamas buryn oılanýy kerek edi. Ol synǵa qalmaýǵa, prezıdenttiń atyna kir keltirmeýge tyrysýy kerek edi. Meniń oıymsha, ol muny jastyqtyń býymen jasady», - dedi Japarov.
Prezıdent qos ǵashyq halyqtyń synynan keıin durys sheshim qabyldaıdy degen senim bildirdi.
Sondaı-aq, Japarov bıliktiń TJM tikushaqtaryn jalǵa beretinin aıtty. Al odan túsken qarajatty búdjetke joldanady.
Esterińizge sala keteıik, Lázzat Nurqojoevaǵa 24 maýsymda Orýý-Saı shatqalynda turmysqa shyǵý usynysy jasalǵan bolatyn. Ol úshin jastar eldiń TJM tikushaǵyn paıdalanǵan. Bul oqıǵa halyq arasynda narazylyq týdyrdy.
«El basshylarynyń týystary men jaqyndary basqalarǵa úlgi bolýy kerek, árkimniń tikushaq jaldaýǵa múmkindigi joq. TJM tikushaqtary osylar úshin satyp alyndy ma? Prezıdent ysyrapshyldyqty toqtatý kerek degeni qaıda», — dep jazdy áleýmettik jeli qoldanýshylary.
Qazirgi ýaqytta respýblıka boıynsha, memleket basshysy atap ótkendeı, 20-ǵa jýyq tikushaq bar. Sadyr Japarov týystaryna, baýyrlaryna jáne olardyń balalaryna qatań talaptar qoıyp otyrǵanyn atap ótti.
«Men olarǵa árqashan burynǵy bıleýshilerdiń qatelikterin qaıtalaýdyń qajeti joq ekenin eske salamyn jáne memlekettik isterge aralaspaýdy suraımyn», — dedi ol.
Prezıdent inisiniń qyzynyń eldi shýlatqan bul áreketi úshin keshirim surady.
«Buǵan deıin men basqalarǵa syn aıtyp edim, endi oǵan ózim de ushyradym. Halyqtan baýyrymnyń qyzy úshin keshirim suraımyn, ol áli jas, halyqtyń aıtyp jatqan synyn ózi de estip jatyr. Ol durys sheshim shyǵarady degen úmittemin », — dep qorytty Sadyr Japarov.