Almatyda bıyl uzyndyǵy 250 km bolatyn 274 kóshe ortasha jóndeýden ótedi, osylaısha 92%-ǵa deıin joldyń úlesin jaqsy jáne qanaǵattanarlyq jaǵdaıda jetkizý josparlanǵan, dep habarlaıdy almaty-akshamy.kz.
Qalalyq mobıldilik basqarmasynyń habarlaýynsha, jumys barlyq aýdanda bastalǵan. Bul rette, 20 magıstraldyq kósheni jóndeý 25 tamyzǵa deıin, al aýdandyq kóshelerdi qazan aıynyń sońyna deıin aıaqtaý kózdelgen. 
«Qazir qozǵalysty shekteýdi qajet etpeıtin jumystar júrgizilýde. Bul trotýar tóseý, túnde asfált jabynyn qyrý jumystary. Polımerasfaltbetondy tóselgen soń tehnologıa boıynsha 36 saǵat turý kerek, sondyqtan jol ishinara jabylady», - dedi basqarma basshysynyń orynbasary Ernur Ábjahan.
Sonymen, Dýlatı dańǵylynda ál-Farabı dańǵylynan Naberejnaıa kóshesine deıin, Jandosov kóshesinde Tımırázev kóshesinen Manas kóshesine deıin, Ótegenov kóshesinde Q.Taýasaruly kóshesinen K.Salyqov kóshesine deıin, Berezovskıı kóshesinde Gagarın dańǵylynan Rozybakıev kóshesine deıin, Qabdolov kóshesinde Ótegen batyr kóshesinen Saın dańǵylyna deıin, Turǵut Ózal kóshesinde Tóle bı kóshesinen Raıymbek dańǵylyna deıin, Súıinbaı dańǵylynda Bekmahanov kóshesinen Lavrenev kóshesine deıin jáne t.b. jumys bastaldy. 
Jóndeletin kóshelerdiń aýmaǵynda merdigerlik uıym basshylarynyń baılanys aqparaty bar arnaıy stendter ornatylady. Kólik qozǵalysyn shekteý qala turǵyndaryna BAQ jáne áleýmettik jeliler arqyly habarlanady, sondaı-aq jóndeletin ýchaskeler «2Gıs» jáne «Iandeks karty» servısterinde kórsetiledi.
Esterińizge sala keteıik, shahar turǵyndaryna yńǵaıly bolý úshin jol ınfraqurylymyna arnalǵan arnaıy Telegram arnanyń @AlmatyJolybot chat-boty iske qosyldy. Ol arqyly turǵyndar qala joldaryndaǵy shuńqyrlardy jóndeýge ótinish bere alady.