Japarov Áltaevtyń úndeýi yńǵaısyz boldy dep otyr.
Qazaq pen qyrǵyzdyń dostyǵyn alǵa tartqan prezıdent bul jerde eshqandaı saıasat joq ekenin aıtty, dep habarlaıdy Almaty-akshamy.kz
Budan buryn Amanjol Áltaev qyrǵyz memleketiniń basshysy qazaq aqyny Birjan Qaldybaevqa arǵymaq syıǵa tartqanyn synǵa alǵanyn jazǵan edik.
«Iá, baýyrymyz Amanjol Áltaevtyń áleýmettik jelidegi úndeýin men de oqydym. Árıne, bul yńǵaısyz úndeý boldy. Eń aldymen «Elshige de, ánshige de ólim joq» deıdi. Elshiler óz jumysyn jasaıdy. Ánshiler, tipti aqyndar ózderine yńǵaıly jerde án salady. Syn aıtyp án salady, madaqtap án salady, birdeńe suraý úshin án salady. Odan kemshilik, saıasat izdeýdiń qajeti joq. Ekinshiden, aqyn Birjan Qaldybaev qyrǵyzdyń jıeni. Men qazaqtyń jıenimin. Biz týysqanbyz. Besinshi atam Soltonquldyń áıeli Noocha qazaqtyń qyzy edi. Úshinshiden, biz qyrǵyz-qazaqsha sóıleıtin halyqpyz. Sol sátte arǵymaq syıǵa tartpasam, ol maǵan bir kezde án shyrqaıtyn edi. «Naǵashym jaıaý jiberdi, naǵashymnyń bir arǵymaqqa shamasy joq pa? dep aıtar edi. Ol jerge qatyspasam, sol aqynnyń ánin estimesem, áńgime basqa bolar edi. Sondyqtan Amanjol myrzaǵa aıtarym, siz eshqashan jaısyz jaǵdaıǵa tap bolǵan joqsyz»,- dedi Japarov.
Ol bul jerde eshqandaı saıasat joq ekenin aıtty.
«Aıtysker aqyn jıenimniń sózine túsip qalmas úshin ǵana arǵymaq syıǵa tarttym. Al endi men Birjan Qaldybaevtyń qandaı aqyn ekenin de bilmeımin. Men ony buryn da tanymaıtynmyn. Ony kóshe aqyny dep ataǵan. Qazir kóshe aqyny bolsa, aqyry qazaq qyrǵyz halqyna belgili aqyn bolyp keter? «Besiktegi bala patsha bola ma, kim bilsin, qursaǵyndaǵy bala patsha bola ma, kim bilsin» deıdi. Ol jas bala eken. Qoldaý bolsa aqyry ataqty aqyn bolyp shyǵar. Qazaq pen qyrǵyzdy bizden basqa eshkim qoldamaıdy. Biz bir-birimizge qoldaý kórsetýimiz kerek. Qazirgi álemdik jaǵdaı ótkir. Qazaq pen qyrǵyzdyń arasyna ot salǵysy keletin úshinshi kúshter áli de joq emes. Biz mundaı adasýshylyqtan aýlaq bolýymyz kerek. Aramyzdaǵy tynyshtyqty saqtaıyq. Onsyz da at tóbelindeı ǵana elmiz»,- dedi Qyrǵyz prezıdenti.