Qazaqstandyq oqýshy qymyz quıatyn robot oılap tapty.
Ulttyq sýsyndy usynatyn robot «Asylbek» dep atalady, dep habarlaıdy Almaty-akshamy.kz Otyrar.kz-ke silteme jasap.
Túrkistan oblysy, Tóle bı aýdany, Sh.Ýálıhanov atyndaǵy №2 jalpy orta mektebiniń 9-synyp oqýshysy Jansultan Tórebek qymyz quıatyn robot jasap shyǵardy.
Jansultanǵa robotty jasap shyǵýǵa ınformatıka pániniń muǵalimi kómektesken.
Kez kelgen adam robotqa arnaıy plasıkalyq kartany jaqyndatý arqyly «Asylbekti» sóılete alady. Sodan keıin robot qymyzdyń shıpaly qasıeti týraly qysqasha maǵlumat beredi. Osydan soń ǵana ol ydysqa shól basatyn paıdaly sýsyndy quıady.
«Robottardyń túrlerine, jumys isteý prınsıpterine qyzyǵýshylyǵym burynnan bar bolatyn. Mundaı robot qurastyrý ıdeıasy mektebimizde ótken ınformatıka páni aptalyǵynda uıymdastyrylǵan robottar kórmesi kezinde týdy. «Asylbek» robotyn jasaý týraly oıymmen aldymen muǵalimim Laýra apaımen bólistim. Ol ıdeıamdy qoldap, qurastyrýda kómektesetinin aıtty», - deıdi Jansultan.
Onyń pikirinshe, robot oqýshylardyń robototehnıkaǵa degen qyzyǵýshylyǵyn arttyryp qana qoımaı, emdik qasıetke ıe qymyz arqyly jastardyń arasynda salaýatty ómir saltyn dáripteıdi.
«Ulttyq sýsynymyzdy nasıhattaıtyn bolǵandyqtan, «Asylbektiń» ulttyq kıimde bolǵany durys dep sheshtik», – dep atap ótti 9-synyp oqýshysy.
Jansultannyń qymyz quıatyn robot jobasy aýdandyq jáne oblystyq ǵylymı jobalar baıqaýynda júldeli boldy.