Qostanaıda densaýlyq saqtaý qyzmetkerlerimen kezdesýde ne aıtyldy?
Prezıdenttikke kandıdat Saltanat Tursynbekova Qostanaı qalasyndaǵy №4 emhana ujymymen kezdesý ótkizdi.
Emhanany aralaý barysynda úmitker tek medısına qyzmetkerlerimen ǵana emes, naýqastarmen de tildesti. Naýqastardyń biri dári-dármek baǵasynyń qymbat ekenine shaǵymdandy. Ol 1 kýrs em úshin tek ıneksıaǵa 40 000 teńgege jýyq qarajat jumsaǵanyn aıtty.
Dárigerler de emdeý mekemelerindegi túıtkildi máselelerdi jetkizdi
«Dárigerler, ásirese, kásibı mamandar tapshylyǵy bar. Jalaqy óte az. Biz pasıentterdiń jaǵymsyz qarym-qatynasyn da únemi basymyzdan ótkizemiz. Jeke klınıkalarda jaǵdaı áldeqaıda jaqsy. Memlekettik emhanalar men aýrýhanalardaǵy áriptesterimizdiń kóbi tájirıbe jınap, Densaýlyq saqtaý mınıstrliginiń buıryqtaryn jatqa oqyp, jekemenshik mekemelerge jumysqa ketip jatyr. Bul - dárigerler arasynda jıi bolatyn qalypty jaǵdaı», - dedi dárigerlerdiń biri.
Quqyq qorǵaýshy Saltanat Tursynbekova memleket pen halyq yntymaqtasa jumys isteý kerektigin basa aıtty. Úmitkerdiń paıymynsha, dárigerler men medısına qyzmetkerlerine jaqsylap eńbek jaǵdaıyn jasaý kerek, óıtkeni azamattarymyzdyń ómiri osy mamandarymyzǵa tikeleı baılanysty:
«Densaýlyq saqtaý júıesinde, medısınaǵa qarjy bólýde barlyq jerde sheshimin tappaǵan máseleler kóp. Bul máselelerdi tez arada sheshý qajet dep esepteımin. Óıtkeni, dárigerlerge jaqsy jumys jaǵdaılary jasalǵanda, olar da naýqastarǵa oń áserin tıgizedi. Munyń bári júıeniń qalaı durys qurylatynyna baılanysty», - deıdi Saltanat Tursynbekova.
Eske salaıyq, Qostanaı oblysy - kandıdattyń saılaý aldyndaǵy úgit-nasıhat saparlarymen barǵan jetinshi óńiri.