Jat aǵym ókilderine qarý satqandar 2 jyldan 5 jylǵa deıin bas bostandyǵynan aıyryldy.
Olardan 347 birlik qarý, 13 granata jáne 7 387 oq-dári alyndy, dep habarlaıdy Almaty-akshamy.kz QR UQK baspasóz qyzmetine silteme jasap.
Qazaqstanda tirkeýden shyǵarylǵan qarý-jaraqty qylmys álemi men destrýktıvti dinı aǵym ókilderine satyp kelgen quqyq qorǵaý organdarynyń qyzmetkerleri men burynǵy qyzmetkerlerine, sondaı-aq olardyń kómekshilerine sot úkimi shyqty.
Ulttyq qaýipsizdik komıteti ishki ister mınıstrligimen birlesip, Almaty qalasy jáne Almaty, Pavlodar, Soltústik Qazaqstan, Qaraǵandy oblystarynda qarýdy qaıta aınalymǵa shyǵarý arnasynyń jolyn kesti.
Tirkeýden shyǵarylǵan qarý men oq-dári qylmystyq sqema boıynsha joıyldy degen jalǵan esep arqyly keıin satylýǵa shyǵarylyp otyrǵan.
«Quryqtaý jáne tintý barysynda 347 birlik qarý, 13 granata jáne 7 387 oq-dári alyndy. Polısıanyń burynǵy qyzmetkeri uıymdastyrǵan qarýdy modıfıkasıalaý sehy joıyldy», - dep habarlady UQK.
Sonymen qatar, qarý-jaraqty kimder satyp alǵany anyqtaldy. Olar - qylmys álemi, destrýktıvti dinı aǵymdar jáne burynǵy polıseıler.
Sot úkimimen kináli adamdar 2 jyldan 5 jylǵa deıin bas bostandyǵynan aıyrý jazasyna kesildi.
Qyzmettik mindetine salǵyrt qaraǵany jáne jeke quramdy baqylaýdy álsiretkeni úshin quqyq qorǵaý organdarynyń birqatar basshysy teris negiz boıynsha qyzmetten shyǵaryldy.