Almaty Memlekettik qýyrshaq teatry qazirgi zamanaýı tendensıalardy, kórkemdik-estetıkalyq ózgeristerdi, jahandyq álemdegi jańa baǵyttar men úzdik sheshimderdi meńgerý, teatrdyń búgingi tynysyn keńeıtý jolynda Halyqaralyq iri jobalarǵa qatysýdy negizgi jumys barysyna aınaldyrǵan, dep habarlaıdy Almaty-akshamy.kz.
Osy oraıda, teatr ujymy Qazaqstan ǵana emes Túrkıa, Reseı memleketterimen qatar Eýropa elderiniń de iri, bedeldi qýyrshaq teatr festıválderine arnaıy shaqyrtý alyp, úzdikter qatarynan kórinip júrgendigin basa aıta ketken jón.
Teatrdyń baspasóz qyzmetiniń habarlaýynsha, 2022 jyly atalmysh óner ujymy Bolgarıa Respýblıkasy, Varna qalasynda ótkizilgen XVII Halyqaralyq «Altyn delfın» qýyrshaq teatrlar festıvalinde álemdik klasıkanyń ozyq úlgisi – «Romeo men Djýletta» (rej.:D.Jumabaeva) oıylymyn usynyp Gran - prı júldesin, sonymen qatar teatr artıseri Shohan Qulnazarov «Eń úzdik er adam róli», Ulan Asanbek jáne Ulpan Serik «Eń úzdik» debút nomınasıalaryn ıelengen bolatyn.
Bıylǵy jyly Eýropanyń tóri Bolgarıa Respýblıkasy, Býrgas qalasynda 30 shilde men 5 tamyz aralyǵynda ótkizilgen ashyq aspan astyndaǵy H Halyqaralyq “Qýyrshaq kúnderi” atty festıválge arnaıy joldama alyp, teatrdyń boıtumaryna aınalǵan, otyz segiz jyldyq tereń tarıhqa ıe qýyrshaq teatrynyń anasy Quralaı Eshmuratovanyń rejıserligimen sahnalanǵan «Qýyrshaq dýman» qoıylymymen qatysty.
Sonymen qatar, H Halyqaralyq “Qýyrshaq kúnderi” atty festıvál aıasynda teatr ujymy Býrgas qalasynyń meri – Dımıtr Nıkolovtyń arnaıy qabyldaýynda bolyp bolashaqtaǵy birlesken jobalar týrasynda josparlar qurylyp, júzege asyrylýy talqylandy.
Býrgas Memlekettik qýyrshaq teatrynyń basshysy Hrıstına Arsenovamen shyǵarmashylyq kezdesý uıymdastyrylyp, zamanaýı tehnıkalyq jabdyqtardy qoldana kúrdeli de sapaly qýyrshaqtardyń daıyndalýynan, júrgizilýi men saqtalýynan, teatr tynysynyń habar beretin ekskýrsıamen jalǵasyn tapty.
Atalmysh festıválge elimizden bólek Bolgarıa, Nıderland, Rýmynıa memleketterinen iriktelgen tańdaýly on úsh ujym óner kórsetken dúbirli dodada Almaty Memlekettik qýyrshaq teatry Býrgas qalasy ákimshiliginiń sheshimimen «Gran-prı» júldesin jeńip aldy.
