Almaty Memlekettik qýyrshaq teatry Alǵys aıtý kúnine oraı kishkentaı búldirshinder men olardyń ata-analaryna rýhanı demalys, shattyqqa toly kóńil-kúı, tańǵajaıyp sıqyrly sapar syılady. Teatr repertýaryndaǵy úzdik qoıylymdardyń biri de biregeıi – «Qýyrshaq dýman» qoıylymyn qaıyrymdylyq maqsatta usyndy.
Shynaıy da tunyq bolmysymen perishte júrekti kishkentaı kórermenderdi ertegilerdiń tuńǵıyq álemine jeteleıtin qýyrshaq teatrynyń ujymy jyl saıyn teatr tórine áleýmettik jaǵdaıy tómen, múmkindigi shekteýli, az qamtylǵan otbasylarǵa arnap qaıyrymdylyq qoıylymdar kórsetýdi ıgi dástúrge aınaldyrýda. Bıylǵy jyly da teatr sahnasynda otyz segiz jyl boıy úzdiksiz kórsetilip kele jatqan alpysqa jýyq qýyrshaq túri óner kórsetetin «Qýyrshaq dýman» qoıylymy óz kórermenderin asyǵa kútedi.
Súıikti búldirshinderine úzilissiz qyzmet jasaıtyn óner ordasynyń repertýar qorjynyndaǵy úzdik qoıylymdardy balalardyń demalys ýaqytyn durys baǵytta uıymdastyrý maqsatynda repertýar kókjıegi tárbıelik, adamgershilik, estetıkalyq qundylyqtar men asa baı mádenıetimiz ben asyl muramyzdy dáripteıdi.
«Óskeleń urpaqtyń úılesimdi damýy men baqytty balalyǵy – bul bizdiń jalpyulttyq mindetimiz», – dep atap ótken Memleket basshysy Qasym-Jomart Toqaevtyń Jarlyǵymen jarıalanǵan Balalar jyly aıasynda teatr ujymy qalamyzdaǵy jalpy bilim beretin mektep oqýshylary men mektepke deıingi uıym tárbıelenýshilerine arnap tárbıelik jáne tanymdyq maǵynasy zor dostyq pen kópshildikke úndeıtin «Úıshik», mýzykalyq saýattylyqqa shaqyratyn «Qasqyr men jeti laq», qorqynyshty jeńýge úıretetin «Arystannyń úreıin qalaı emdeımiz?» syndy qoıylymdardy usynyp keledi.
Sonymen qatar, balalardy mádenıetke shaqyrý, qýyrshaq ónerimen tanystyrý jáne teatr mádenıetin qalyptastyrý maqsatynda jalpy bilim beretin mektep oqýshylaryna teatr ártisterimen qatysýymen «Qýyrshaqtar qupıasy» atty sheberlik saǵattaryn ótkizýde.
Qýyrshaq teatrynyń qazynaly qoıylymdarynan qapy qalmańyzdar deımiz. Kóktem shattyqqa toly bolsyn!