Adamzat balasynyń armany bitpeıdi. Bala kúnimizden qıalshylmyz. Tipti ásershilmiz. Saıahatty janymyz súıedi. Keı-keıde ózge elge barýdy kókseımiz. Biraq sáti qashan túseri belgisiz. Sonyń yńǵaıy byltyr keldi. Tileýim oryndaldy. Ǵylymı joba boıynsha aptalyq isspar jasadyq. Ystambul kóshesin kezdik.
Jalpy, delegasıada 6 adambyz. Mysyr bazary qasyndaǵy Fatıh aýdanyna aıaldadyq. Ylǵal aýa. Qara teńizdi aınala ushqan shaǵala. Árli-berli júrgen adamdar. Qyzyldy-jasyldy shamdar. Bir shetinde balyq aýlaǵandar júr. Tamaqtanatyn ortalyqtar kóp. Úıler ústi-ústine ornalasqan. Óıtkeni qalanyń jer bederi qyrly-oıly bolyp keledi. Bári-bári erekshe.
Osylaısha Aııa Sofıa hramyna keldik. Jergilikti turǵyndar meshitti murajaı dep atap ketipti. Syrty qyzǵylt-sary ǵımarat "men mundalaıdy". Aýmaǵynda kisi qarasy kóp. İshki jaǵyn ekige bólip temir sharbaqtar tur. Qulshylyq etýshiler ári ótedi. Al tamashalaýshylar berigi jaǵyn kóre alady. Sarǵysh otqa uqsaǵan kóptegen alaý shamdar ilinýli tur eken.
Quddy tarıhı fılm kórgendeı nemese orta ǵasyrǵa tap bolǵandaı kúı keshesiz. Sondaı ǵajaıyp sheberlikpen jasalǵan. Shyǵyp bara jatqanda joǵaryǵa kózim tústi. Burylyp toqtaı salyp, kóz jiberdim. Ikonany kózim shaldy. İshteı hrıstıan rýhanı áleminiń úlken qundylyǵynyń saqtalǵanyna tańqaldym. Sonaý Konstantınopol dáýirindegi qundylyq áli kúnge sheıin murty buzylmapty.
Bul da bolsa jahanǵa ortaq jaýhar - Aııa Sofıany barsha qadirleıdi degen sóz. Sóıtip, Almatyǵa oraldyq. Qazaqtyń «myń ret estigennen, bir ret kórgen artyq» degen ataly paıymynyń rastyǵyna taǵy da kóz jetkizip qaıttyq.
Oljas MURATBEKULY