Noǵaıty ózenindegi sý deńgeıi tómendedi.
Sý tasqyny qaýpine baılanysty Atyraý oblysynyń Saǵyz aýylynan evakýasıalanǵan turǵyndar úıine oraldy, dep habarlaıdy Almaty-akshamy.kz QazAqparatqa silteme jasap.
Oblystyq tótenshe jaǵdaılar departamenti baspasóz qyzmetiniń málimetinshe, 30 naýryzda saǵat 22:00-de Noǵaıty ózeni tasyǵan.
Noǵaıty ózeni Aqtóbe oblysynan bastalyp, Atyraý oblysyndaǵy Saǵyz aýyly arqyly aǵyp, Qońyrsaı ózenine quıylady. Ózenniń tasýyna qardyń erýi sebep bolǵan. Sý deńgeıi shamamen 3 metrge kóterildi.
«Sol sebepten, Saǵyz aýylyndaǵy birneshe úıdi sý basý qaýpi tóndi. Turǵyndardy qutqarý jumysyna tótenshe jaǵdaılar departamentiniń (18 qyzmetkeri), jergilikti atqarýshy organnyń (25 qyzmetkeri), jergilikti turǵyndar (100 adam), aýdandyq polısıa bóliminiń (2 qyzmetker 2 tehnıka), «Shanhaı kontrakshn» JSHS (3 qyzmetker, 1 tıegish), «Adaı» JK (3 qyzmetker 1 tıegish), «Erbolat» JK (1 qyzmetker, 1 tıegish) jáne «Qazaqstan temirjoly» (30 qyzmetker) kompanıasynyń qatysýymen turǵyndardy jergilikti mektep pen kolejge evakýasıalaý júrgizildi. Al ózen jaǵasy qum úıindisimen bekitildi», - dep habarlady departamenttiń baspasóz qyzmeti.
Evakýasıalanǵan turǵyndar sany – 50 adam. Onyń ishinde 23 bala bar.
«Búgin, 31 naýryzda, saǵat 09:00 shamasynda Noǵaıty ózenindegi sý deńgeıi tómendedi. Sý basý qaýpi seıilgennen keıin saǵat 03:30-da evakýasıalanǵan turǵyndar úıine oraldy», - dep málim etti departamentten.