Ótken táýlikte mamandar 372 adamdy, onyń ishinde 312 bala qutqardy jáne evakýasıalady.
Qazaqstandyq qutqarýshylar aýa raıyna baılanysty memleket azamattaryn qaýipsizdik sharalaryn saqtaýǵa shaqyrady, dep habarlaıdy Almaty-akshamy.kz.
30 naýryzda «Qazgıdromet» málimetteri boıynsha elimizdiń Shymkent qalasynan basqa óńirlerinde daýyldy eskertý jarıalandy. Osy óńirlerde qar jáne jańbyr jaýyp, jeldiń ekpini sekýndyna 15-20 metrge kúsheıýi yqtımal.
TJ mınıstrliginde TJ-ny joıý jónindegi respýblıkalyq shtab quryldy. Aqmola, Aqtóbe, Pavlodar, Qostanaı, Qaraǵandy, Soltústik Qazaqstan oblystarynda osyndaı shtabtar jumys júrgizýde. Psıhologıalyq kómek jáne aqparattyq qoldaý kórsetý úshin respýblıkalyq jáne aýmaqtyq shtabtarda "jedel jeli" telefony jumys jasaıdy.
«Ótken táýlikte qutqarý bólimsheleri Nur-Sultan qalasy, Aqmola, Aqtóbe, Qaraǵandy, Qostanaı oblystarynda 372 adamdy, onyń ishinde 312 bala qutqaryldy jáne evakýasıalandy. Apattan qutqarý jumystaryna TJM, İİM, jergilikti atqarýshy organdar men jol qyzmetterinen 539 adam jáne 277 birlik tehnıka jumyldyryldy»,- delingen TJ mınıstrliginiń baspasóz qyzmetiniń habarlamasynda.
Aqmola, Qaraǵandy, Pavlodar, Qostanaı oblystarynyń jylytý pýnktterinde 89 adam, onyń ishinde 11 bala bar.
Avtojoldardyń jabyq ýchaskelerinde halyqty evakýasıalaý úshin 40 ýaqytsha jylytý pýnkti daıyndaldy. Jol qyzmetteri qardy tazalaý jumystaryn júrgizýde.
Halyqty eskertý maqsatynda aýa raıynyń nasharlaýy týraly 74 SMS-habarlama jiberildi jáne «Dármen» mobıldik qosymshasy arqyly 56 habarlama joldandy, 15 teleradıoefırmen qarmaý júrgizildi.
Qazirgi ýaqytta Aqmola, Almaty, Aqtóbe, Shyǵys Qazaqstan, Qaraǵandy, Qostanaı, Pavlodar, Soltústik Qazaqstan oblystarynda avtojoldardyń 111 ýchaskesi jabyldy, olardyń 52-si respýblıkalyq jáne 59-y oblystyq mańyzy bar joldar.
Blok-beketterde 1 434 birlik tehnıka, onyń ishinde 946 jeńil, 482 júk kóligi jáne 6 avtobýs tur: Aqmola oblysynda – 735 birlik tehnıka (547 jeńil jáne 188 júk kóligi), Qaraǵandy oblysynda – 532 birlik tehnıka (318 jeńil, 208 júk kóligi jáne 6 avtobýs), Qostanaı oblysynda – 57 birlik tehnıka (35 jeńil, 22 júk kóligi), Pavlodar oblysy - 110 birlik tehnıka (46 jeńil, 64 júk kóligi).
Ótken táýlikte Nur-Sultan, Almaty qalalarynda, Aqmola, Almaty, Aqtóbe, Atyraý, Jambyl, Qaraǵandy, Qyzylorda, Pavlodar jáne Soltústik Qazaqstan oblystarynda qatty daýyldy jeldiń saldarynan shatyrlardyń buzylýy men aǵashtardyń qulaýy, sondaı-aq elektr energıasynyń ishinara ajyratylýy oryn aldy. Nur-Sultan, Almaty qalalarynda jáne Almaty oblysynda tótenshe jaǵdaılardyń saldarynan 6 adam, onyń ishinde 3 bala zardap shekti.
QR TJM qaýipsizdik sharalaryn saqtaýǵa shaqyrady! TJ bolǵan jaǵdaıda 112 telefonyna habarlasyńyz.
«Azamattardy aýa raıynyń ózgerýin baqylaýǵa shaqyramyz. Daýyl týraly eskertý habarlamalaryn eskerińiz jáne qajetti saqtyq sharalaryn saqtańyz. Eldi mekender arasyndaǵy tas joldaryna shyǵýdy josparlamas buryn, aldaǵy qozǵalys baǵyty boıynsha aýa raıy boljamyn mindetti túrde zerdeleý qajet. Aǵashtardan, turaqsyz jáne synǵysh qurylymdardan aýlaq bolyńyz», - deıdi mamandar.