Itelgiler saıysy qyzyqty ótti
Atyraýda qusbegilerdiń eresekter arasyndaǵy respýblıkalyq HVİ chempıonatynyń jeńimpazdary anyqtaldy, dep habarlaıdy QazAqparat tilshisi.
Chempıonatqa Astana, Almaty qalalarymen birge, Aqmola, Qaraǵandy, Jambyl, Shyǵys Qazaqstan, Túrkistan, Mańǵystaý, Pavlodar, Atyraý, Abaı, Jetisý, Ulytaý oblystarynyń oblystarynan 50-ge jýyq qusbegi qatysty. Olar 31 búrkit, 11 qarshyǵa men 10 ıtelgini synǵa túsirdi.
Búgin aqtyq synda 5 búrkittiń eki shartty oryndaý sheberligi tekserildi. Onyń biri – qasqyrǵa shúıligý. Al, ekinshisi – shyrǵaǵa tartý. Osyndaı synnyń qorytyndysymen Astana qalasynyń turǵyny Serikbek Kúntýǵan «Alǵyr», atyraýlyq Arman Qoshqarov «Naryn» búrkitimen 3-júldege ıe boldy. Saıysqa «Zańǵar» búrkitin qosqan Abaı oblysynyń ókili Erzat Baıqadamov 2-oryndy ıelendi. Al, elordalyq Armanbek Kúntýǵanuly «Qarasholaq» qyranymen el chempıony atandy.
Bul chempıonatta saıysqa túsken qarshyǵalar naǵyz babynda ekeni baıqaldy. Qarshyǵalar saıysynda úshinshi oryndy astanalyqtar – Kúntýǵan Serikbek «Naızatuıaq», Qudaıbergen Raýıluly «Chıpok» atalatyn qusymen ıelendi. Al, Túrkistan oblysynyń turǵyny Baǵdat Keýenov «Tarlan» qarshyǵasymen ekinshi júldege qol jetkizdi. Taǵy bir túrkistandyq Dáýren Arshabaı baptaǵan «Tuıǵyn» birinshi júldege ıe boldy.
Itelgiler saıysy qyzyqty ótti. Bul saıysta túrkistandyq qos qusbeginiń ıtelgisi úshinshi júldeniń ıesi atandy. Olar – Ibragım Bazarbaevtyń «Qarakózi» men Baǵdat Keýenovtiń «Tumary». Ekinshi oryn Jambyl oblysynan qatysqan Baqdáýlet Babajannyń «Qarakóz» atty ıtelgisine berildi. Birinshi júldeni Aqmola oblysynyń namysyn qorǵaǵan Erlan Kenjetaevtyń «Aqbas» ataýy bar ıtelgisi ıelendi.
Eske sala ketelik, buǵan deıin Atyraýda qusbegilerdiń respýblıkalyq chempıonaty ótip jatqanyn jazǵan edik.
Respýblıkalyq qusbegilik federasıasynan chempıonatqa qatysýshylarǵa kún raıy kedergi keltirip turǵanyn málim etken bolatyn.