«Marketpleıs» aqparattyq alańy qurylys materıaldarynyń qunyn 15% deıin tómendetýge múmkindik beredi jáne naryqtyń ashyqtyǵyn qamtamasyz etedi.
QR Indýstrıa jáne ınfraqurylymdyq damý birinshi vıse-mınıstri Qaıyrbek Óskenbaev búgin Memlekettik satyp alýlardyń ashyqtyǵyn arttyrýǵa jáne jalpy qurylys salasynyń jumysyna yqpal etetin jańa sıfrlyq alty joba týraly aıtyp berdi, dep habarlaıdy Almaty-akshamy.kz atalǵan mınıstrliktiń baspasóz qyzmetine silteme jasap.
Qaıyrbek Óskenbaevtyń aıtýynsha, qurylystyń ashyqtyǵyn qamtamasyz etý úshin memlekettik tapsyryspen salynyp jatqan nysandar boıynsha barlyq derekter (qurylys materıaldary men jumys kestesin qosa alǵanda) kelesi jyldan bastap E-Qurylys biryńǵaı aqparattyq júıesi arqyly qadaǵalanady. Barlyq tólemder óz kezeginde Blockchain-platformasy arqyly osy júıege engizilgen aqparat negizinde júzege asyrylady.
Nátıjesinde búdjetten jumsalǵan árbir teńgeni paıdalaný barynsha ashyq júrgiziledi. Memlekettik nysandardaǵy qurylys prosesin sıfrlandyrý (jasyryn jumystardyń barlyq jýrnaldarymen jáne oryndalǵan aktilermen) jumystary bastaldy. Kelesi jyldan bastap proses tolyǵymen avtomattandyrylady. Budan basqa, qurylys jobalarynyń memlekettik derekqory negizinde QR IIDM mamandary irilendirilgen smetalyq normatıvterdi pysyqtap, qalyptastyrdy. Sondaı-aq, qurylys obektisiniń shekti qunyn jyldam esepteýge múmkindik beretin jáne onyń qunyn asyra baǵalaýdy boldyrmaıtyn onlaın-kalkýlátor ázirledi. Kálkýlátor memlekettik saraptama portalynda bekitilgen (epsd.kz). Taǵy bir sıfrlyq jańalyq – otandyq qurylys materıaldaryn onlaın-satýǵa arnalǵan «Marketpleıs» aqparattyq alańy.
Otandyq óndirýshiler memleket qoldaýymen uzaq merzimdi kelisim-sharttar jasasýǵa jáne qurylys materıaldaryn belgilengen qunymen satýǵa múmkindik alady. Qurylys salýshylarǵa da tıimdi»,-dep esepteıdi QR Indýstrıa jáne ınfraqurylymdyq damý birinshi vıse-mınıstri.
Sondaı-aq, qurylystaǵy jergilikti qamtý úlesin arttyrý úshin QR IIDM qoldanylatyn qurylys materıaldarynyń tolyq nomenklatýrasyn kórsetetin elektrondyq tizilim jasady. Búdjet qarajaty esebinen qarjylandyrylatyn obektilerde otandyq qurylys materıaldaryn mindetti túrde qoldaný jónindegi talaptar zań júzinde bekitildi.
E-Qurylys júıesiniń blokcheın-tetikteri arqyly satyp alynǵan otandyq qurylys materıaldary boıynsha merdigerlerdiń esepteri Memlekettik satyp alý portalynda kórsetiledi jáne obektiniń jobalyq-smetalyq qujattamasynda kórsetilgen derektermen avtomatty túrde salystyrylady. Portaldardy ıntegrasıalaý boıynsha jumystar júrgizilýde.