Saǵadat Nurmaǵambetov atyndaǵy Qurlyq áskerleri áskerı ınstıtýtynyń saltanatty eseptobyna eń laıyqty degen kýrsanttar irikteldi, dep habarlaıdy aqshamnews.kz.
Uly Otan soǵysyndaǵy Jeńistiń 80 jyldyǵy men Otan qorǵaýshylar kúnine arnalǵan áskerı sherýge qatysý úshin áskerı ınstıtýttyń 127 kýrsanty men eki ofıseri Astanaǵa keldi. Oqý ornynyń saptyq plasynda úsh aı boıy kún saıyn qarqyndy jattyǵýlar ótkizildi. Endi saptyq tásilderdi odan ári shyńdaý elordanyń jattyǵý alańdarynda jalǵasady.
Árbir kýrsant áskerı sherýge qatysýdy bolashaq ofıserdiń ómirindegi mańyzdy kezeń ekenin jaqsy túsinedi. Bul jaı ǵana jattyǵý nemese kásibı daıyndyqtyń kórinisi emes. Elimizdiń bas alańynda áskerlerdiń saltanatty sap túzeýi Uly Otany soǵysy maıdandarynda erliktiń eren úlgisin kórsetken ata-babalarymyzǵa qurmet bolmaq.
Máselen, kýrsanttar Rýslan Darhanov pen Almas Aıtqannyń atalary Darhan Myńbaev pen Orazaı Musaqov maıdangerler. Biri Ýkraına, endi biri Kalının maıdanynda soǵysqan. Ekeýi de búgingi tarıhı oqıǵaǵa qatysý múmkindigin ıelengenin erekshe maqtan etedi.
Qurlyq áskerleri áskerı ınstıtýty 3-batalonynyń komandıri podpolkovnık Jasulan Seıitqazın ekinshi, úshinshi kýrs kýrsanttary Jeńis sherýine qatysýshylar retinde oqý ornynyń tarıhyna enedi dep esepteıdi. Ol qaramaǵyndaǵylar óz mindetterin sátti oryndaıtynyna senimdi, óıtkeni Jeńis sherýine qatysý – kóptiń armany.