Rıshad Galıev — Almaty qurylys-tehnıkalyq kolejiniń túlegi, onyń eńbek joly jumysshy mamandyqtary týraly stereotıpterdi buzyp qana qoımaı, mańdaı termen adal eńbek tabýǵa yntalandyrady. Búginde ol eldegi eń joǵary jalaqy alatyn jas mamandardyń birine aınaldy. Rıshad aıyna 800 myń teńge tabys tabady. Onyń eńbek joly — maqsatqa jetýdegi jigerli tabandylyqtyń jáne óz isine senýdiń jarqyn mysaly bola alady, dep habarlaıdy aqshamnews.kz Oqý-aǵartý mınıstrligine silteme jasap.
Rıshad — WorldSkills Kazakhstan respýblıkalyq kásibı sheberlik chempıonatynyń birneshe dúrkin júldegeri. 2022 jyly ol álemdik chempıonatqa elimizdiń atynan «Santehnıka jáne jylytý» quzirettiligi boıynsha qatysty. Kolejdiń ekinshi kýrsynda Rıshad kolejdiń jetekshi kompanıalarmen seriktestigi jáne dýaldy oqytý júıesi aıasynda qurylys alańdarynda taǵylymdamadan óte bastady. Osy tájirıbe praktıkalyq daǵdylar men mamandyqty is júzinde ıgerýge múmkindik berdi. Jaqyn arada ol GROHE halyqaralyq kompanıasynan jumysqa ornalasýǵa usynys aldy.
Ol mamandyqty áýel basta ata-anasynyń keńesi boıynsha tańdady, keıin bul mamandyq onyń júrek qalaýyna aınalǵan.
«Men ózim oqyǵan kolejge jáne ustazdaryma alǵys aıtamyn — olar maǵan tek bilim ǵana berip qoımaı, maman retinde ózime degen senimdilikti arttyrdy. Kolejdiń kompanıamen yntymaqtastyǵynyń arqasynda men eńbek tájirıbemdi erte bastaýǵa múmkindik aldym jáne bul meniń ósý núkteme aınaldy. Men Jumysshy mamandyqtarynyń jyly úshin el Prezıdentine erekshe rızamyn. Bul mańyzdy qadam, ol bizge jumysshy mamandyǵynyń ıesi bolý — qurmetti, zamanaýı jáne suranysqa ıe ekendigin dáleldeıdi. Jumysshy mamandyqtary — bul bizdiń óz qolymyzben qalap jatqan bolashaǵymyzdyń irgetasy», — deıdi kolej túlegi.
Qazirgi tańda Almaty qurylys-tehnıkalyq kolejinde 1200-den astam stýdent oqıdy. Olardyń 90%-ǵa jýyǵy alǵan mamandyqtary boıynsha jumysqa ornalasady. Dýaldy oqytý jáne jetekshi kásiporyndarmen belsendi yntymaqtastyqtyń arqasynda stýdentter 2-3-kýrstarda aqyly tájirıbeden ótýge múmkindik alady. Bul kezeńde oqýshylardyń ortasha tabysy aıyna 300 myńnan 500 myń teńge aralyǵyn quraıdy.