QR Sportty damytý dıreksıasy oqıǵaǵa túsinikteme berdi
Búgin, 27 tamyzda Aqordada Parıjdegi jazǵy Olımpıada júldegerlerin saltanatty marapattaý rásimi ótti. Olımpıadashylar men olardyń jattyqtyrýshylary Qazaqstan prezıdenti Qasym-Jomart Toqaevtyń qolynan memlekettik marapattar aldy. Alaıda, is-sharanyń saltanattylyǵyna qaramastan, kúmis júldegeri, gımnast Narıman Qurbanovtyń bul jıynǵa qatyspaǵany kópshiliktiń nazaryn aýdardy. Taspanews.kz tilshisi memleket basshysy Qazaqstan úshin tarıhı medal alyp kelgen sportshynyń nege marapattaýdan shet qalǵanyn anyqtaýǵa tyrysty.
QR Sportty damytý dıreksıasynyń baspasóz qyzmetiniń ókili Shamken Baıyrbektiń aıtýynsha, Narıman Qurbanov belgili bir sebeptermen Prezıdenttiń marapattaý rásimine qatysa almaǵan. Ol sportshynyń ózine tıesili barlyq marapattardy alatynyn aıtty.
«Narıman belgili bir sebeptermen Prezıdenttiń marapattaýyna qatysqan joq. Ol Prezıdent pen memleketten ózine tıesili barlyq marapattaryn alady,» – dedi Baıyrbek Taspanews.kz tilshisine.
Onyń aıtýynsha, Narıman Qurbanov qazirgi ýaqytta Almatyda. Marapattaý rásimine Narımannyń ákesi ári jeke jattyqtyrýshysy Hýsanjan Qurbanov qatysty.
Keıinirek, Taspanews.kz redaksıasyna QR Sportty damytý dıreksıasynyń baspasóz qyzmetiniń basshysy Aıan Tólegen baılanysqa shyǵyp, sportshynyń «azdap aýyryp qalǵanyn» málimdedi. Biraq, tilshiniń olımpıada júldegeriniń prezıdentpen kezdesýine qandaı dert áser etkeni týraly suraǵy jaýapsyz qaldy.
Eske salsaq, Qasym-Jomart Toqaev Olımpıadada jarqyn juldyz bolyp janǵany úshin Narıman Qurbanov pen onyń ákesi jáne jattyqtyrýshysyna – Hýsanjan Qurbanovqa «Parasat» ordenin bergen.
Taspanews.kz tilshisi kúmis júldeger Narıman Qurbanovpen jáne QR gımnastıka Federasıasymen baılanysýǵa tyrysty, alaıda sportshy da, federasıanyń baspasóz hatshysy da qońyraýlarǵa jaýap bermedi.