Aıt qarsańynda áleýmettik jeliniń bári habarlandyrýǵa tolyp ketti.
Qurban aıtta shalynatyn qoıdy habarlandyrý saıttarynan satyp alýǵa nemese mamandandyrylǵan saıttar arqyly tapsyrys berýge de bolady, dep habarlaıdy Almaty-akshamy.kz
Biraq qoıdyń baǵasy san alýan: eń arzany 35 myńnan bastalyp 150 myńǵa deıin óse beredi. Keı saýdager semiz qoıǵa 120 myń teńge suraıdy.
Almaty men Almaty oblysynda ortasha baǵa – 60 myń teńge, elordada mal basyna 40-50 myń teńge aralyǵynda suraıdy. Petropavl men Soltústik Qazaqstan oblysynda da osyndaı baǵa. Pavlodar qalasy men Pavlodar oblysynda - 40 myńnan 60 myń teńge aralyǵyn qamtıdy. SHQO, Qaraǵandy oblysy, Shymkenttegi baǵa - 35-ten 45 myń teńgege deıin. Túrkistan oblysynda, Tarazda da osyndaı baǵa. Alaıda munda arakidik qymbat baǵa da kezdesedi: 65-70 myń teńge. Batys Qazaqstan oblysynda qoı baǵasy qymbat, mysaly Aqtaýda qurbandyq malynyń baǵasy 60 myń teńgeden bastalady. Aıta ketý kerek, barlyq derlik qala men oblystarda tiri qoıdy arzanyraq satyp ala alasyz, habarlandyrý saıttarynda kórsetilgen eń tómengi baǵa – 35 myń teńge. Jalpy, baǵa maldyń tuqymyna, jaǵdaıyna jáne jasyna baılanysty bolyp keledi.
Bir qyzyǵy, keıbir sharýashylyqtar bul máselede qyzmettiń tolyq spektrin usynady. Mysaly, saıttan jetkizý nemese "ózim alyp ketemin" degen fýnksıany tańdaı alasyz, qajetti kúndi belgileı alasyz, tipti molanyń qurbandyq malyn shalý kezinde Quran oqyǵanyn kórsetetin vıdeo men sýretter esepter de usynylady. Sonymen qatar, satýshylar tutynýshynyń qalaýy boıynsha qoı etin jiliktep bere alady.
Qazaqstan musylmandary dinı basqarmasynyń málimetinshe, sharıǵatta qurbandyqqa tórt túlik (qoı, eshki, sıyr, túıe) maldy shalady. Eshkiniń jáne qoıdyń jasy bir jyldan asqany, sondaı-aq alty aıdan asqan toqty (qoı sekildi) iri, qońdy bolsa qurbandyqqa jaramdy.
Sıyrdyń eki jastan asqany, al túıeniń jasy bes jyldan asqany qurbandyqqa shalynady. Sonymen qatar soıylatyn maldyń kemshilik, kináraty bolmaýy kerek.