Danıada alǵash ret qasıetti Quranǵa qurmetsizdik kórsetken eki adamnyń ústinen sot prosesi bastaldy.
Bul jaıynda islam.kz portaly yeniasir.com.tr aqparat kózine silteme jasaı otyryp málim etedi, dep habarlaıdy aqshamnews.kz.
Kopengagen prokýratýrasynyń jazbasha ótinishinde aıtylǵandaı, alǵash ret Danıanyń qylmystyq kodeksine sáıkes qasıetti Quranǵa qarsy áreket etken eki adamnyń ústinen is qozǵalǵan. 2024 jyldyń maýsym aıynyń 15-i kúni Bornholm aralynda ótken aksıa barysynda qasıetti Quranǵa qurmetsizdigimen kózge túskenderge qatysty is kartotekasy Bornholmdegi sotqa jiberilgeni jáne sot talqylaýynyń kestesi anyqtalmaǵany aıtylǵan habarlamada.
Pikirleri málimdemege engizilgen Kopengagen prokýrory Lıs Lotte Nılas: «Bizdiń bergen baǵamyz turǵysynan qoǵamdyq orynda Quranǵa qarsy orynsyz áreketter jasaldy jáne kóptegen adamdar osy oqıǵanyń kýási boldy. Oqıǵalar Facebook áleýmettik jelisinde jarıalanyp, odan da keń aýdıtorıaǵa jetti», dep málimdedi. Prokýror kúdiktilerdiń zańǵa qaıshy áreketi dáleldense, olarǵa aıyppul salynatynyn jetkizdi.
Osy oraıda 2023 jyldyń jeltoqsan aıynyń 7-i kúni Danıada qasıetti Qurandy jáne ózge de kıeli kitaptardy órteýge tyıym salý qarastyrylǵan zań jobasynyń qabyldanǵanyn aıta ketpekpiz. Atalǵan zań talaptaryn elemegender eki jylǵa deıin bas bostandyǵynan aıyrylady nememese iri mólsherde aıyppul salynady.