Qazaq men Ózbek shekarasynda qupıa týnel tabyldy. Jasyryn jolmen júrgen quqyq qorǵaý organy qyzmetkerleri quny 1 mıllıard som turatyn dári-dármekke tap bolǵan, - dep habarlaıdy almaty-akshamy.kz gazeta.uz-ǵa silteme jasap.
Osylaısha Ózbekstanda Qazaqstan arqyly Úndistannan sapasyz iri kólemdegi dári-dármekterdi jetkizýmen aınalysqan transshekaralyq qylmystyq toptyń joly kesildi. Jedel sharany Memlekettik kúzet qyzmeti Shekara áskerlerimen jáne Keden komıtetiniń "Tashkent-Aero" mamandandyrylǵan keden keshenimen birlesip júrgizgen.
Jedel is-shara barysynda dári-dármektiń kelesi partıasy Delıden Almatyǵa Tashkent arqyly tranzıtpen jetkizilip, odan keıin Qazaqstanmen shekaralas Túrkistan oblysy, Saryaǵash aýdany, Dostyq aýylyna jetkizilip, jasyryn týnel arqyly Órikzorǵa tasymaldanǵany anyqtaldy.
Uzyndyǵy 310 metr týnel Órikzor aýylyndaǵy 1975 jyly týǵan turǵynnyń úıinen shyqqan. Eń qyzyǵy, qupıa týnel arnaıy jeldetý jáne jaryqtandyrýmen jabdyqtalǵan. Tipti, júk tasymaldaýǵa arnalǵan arbalar men arqandar bar.
Qylmystyq toptyń kúdikti múshelerinen Úndistanda jasalǵan 107 ataýdaǵy 17 048 qaptama esirtki zattary tárkilendi. Atap aıtqanda, albýmın, remdesıvır, meropenem sekildi túrleri bar bolyp shyqty. Olardyń jalpy quny 1 mıllıard somnan asady.
Búgingi tańda osy is boıynsha qylmystyq is qozǵalyp, qylmystyq topqa qatysy bar degen kúdikpen birneshe adam ustalǵan.