Motıvatsıya - tek jaqsy oılardyń jemísí
Qazírgí tańnyń eń ózektí dúnıesí – motıvatsıya. Ony bíreuler kókten, ekínshílerí jerden ízdeude. Taǵy basqalary ǵalamdy sharlauda. Qalamger Sherhan Mūrtaza atamyz aıtqandaı, «...Bír kem dúnıe!».
Kúndelíktí uaqyt jūmys pen úıdíń arasynda ótude. Alyp qalalarda uaqyttyń bíraz bólígín jol ūrlaıdy. Ūrlap qana qoımaıdy. Sonymen bírge sharshauǵa alyp keledí. Kóbímíz osydan zerígemíz. Bíraq ketíse almaımyz. Búgíngí eń ózektí taqyryp ta osy. Sol sebeptí bírshama oılardy ortaǵa saludy dūrys dep bíldík.
Avstrıyalyq dáríger nevrolog árí «psıhoanalız» ílímíníń negízín salushy Zıgmund Freıd adam janyna ne kerektígí turasynda kóp ízdengen. Ǵalym mynadaı bír oı qaldyrypty. Ol «Adam 80% sudan tūrady. Eger adamnyń armany ne ūly maqsaty bolmasa, ol bar bolǵany tígínen tūrǵan shalshyq qana» deptí. Dál aıtylǵan naqyl. Qazírgí qoǵamda ózíníń túpkí maqsatyn joǵaltyp, díttegen múddesí joq jan quys keude syqyldy. Būl qoǵam ondaılyqqa tózbeıdí. Dáríger Freıdtíń aıtpaǵynyń túpkí mání osyǵan sayady.
Bízder osy maqala arqyly kóptegen adamdardyń janyn jadyratatyn 5 keńestí ūsynamyz:
Bírínshí. Baǵdar jasau kerek. Qaıda, qalaı bara jatqanyńyzdy ańdaǵan jón. Ol úshín síz súríp otyrǵan qoǵamnyń yǵyn baǵdarlaǵan abzalyraq. Eger síz mekteptí ayaqtap, unıversıtetke túspek bolsańyz, mūqıyat zerdeleńíz. Qoǵamǵa qajettí, sūranysqa ıe mamandyqty tańdańyz. Būl, bír jaǵynan, bárímízge belgílí, qarapaıym bolyp kórínuí múmkín. Dese de, ózgeníń aıtuymen jany qalamaǵan salany tańdaıtyndar da bar. Bíraq, odan túk shyqpauy yqtımal. Sondyqtan júrek není dūrys sanaıdy, soǵan qūlaq túríńíz. Al eger mańyzdy tańdau aldynda tūrsańyz, sol salanyń mamanynan nemese kóregen kísíden keńes alǵan artyqtyq etpeıdí.
Ekínshí. Jetístíkke jetken tūlǵanyń avtobıografıyasyn oqyńyz. Dáp qazírgídeı uaqyt tyǵyz zamanda, derektí fılmder men qysqasha motıvatsıyalyq beıneúzíkter kóruge keńes berer edík. Óıtkení, sízdíń janyńyzǵa kerektíní áserlendíríp tyńdaǵanǵa ne jetsín!
Úshínshí. Jaqsy jandarmen joldas bolyńyz. Múmkíndík tuyp jatsa, syılasyńyz. Arasynda syrlasyńyz. Degenmen, syr aldyrmańyz. Bárín elep-ekshep, ańdap sóılegen abzal bolmaq. Joldaǵy beıtanys adamǵa oıyńyzdaǵyny aıtuǵa bolady. Bíraq, būl arada ózge bíreudíń yǵyna túsíp ketuden saqtanyńyz. Meıílínshe, jasy úlken, kóptí kórgen kísímen dıdarlasyp, syr shertískenge ne jetsín?!
Tórtínshí. Sayahattauǵa jıí kóńíl bólíńíz. Ol úshín míndettí túrde Gavaı araldaryna ketudíń qajetí joq. Dese de, oǵan baryp, demalyp, el men jer kóríp qaıtudan bas tartpaǵan jón. Óıtkení, shetelge shyqsańyz, jaqsyny kóresíz, táuír adamdarmen sóılesesíz, ózíńízge qajettíní alasyz. Jer-dúnıeníń ǵajaıybyn sezínesíz. Osydan keıín basyńyzǵa jaqsy ıdeyalar keledí. Míne, tylsym, míne, keremet. Osy atalǵandy oryndaǵyńyz kelse, qydyrudy aınalańyzdaǵy ásem tabıǵattan bastańyz. Sonda ár nárse óz retímen bolmaq.
Besínshí. Basyńyzdy kóp nársege qatyrmańyz. Keler 10-20 jylda nendeı nárse bolady? Onyń íshínde tūrmystyq jaǵdayattarmen mı qyrtysyn toltyryp almańyz. Materıaldyq jaǵdaı, sízdíń mádenı ruhanıyatyńyzdyń dertíne aınalmasyn. Bárí ótkínshí, bárí sheshíledí. Eń negízgí qaǵıda, kírís pen shyǵysty esptep otyryńyz. Kúndelíktí esebíńíz anyq bolsa, oıyńyz tez sharshamaıdy. Sonda ǵana ómírge degen qūlshynys oyanady.
Jaqsy ómírge qadamdy búgínnen qūryńyz. Adamzatqa árbír sát qymbat. Árbír kún baqyt. Árbír táulík múmkíndík. Árbír jyldar tarıh.
Būl dúnıede adamǵa berílgendeı múmkínshílík ózge maqūlyqqa ne tírshílík ıesíne berílmegen. Árdaıym osyny este ūstańyz!
Qūlshynysyńyz jasymasyn!!!