Olardy medısınalyq jabdyqpen jaraqtaý kezinde otandyq óndirýshilerge basymdyq beriletin bolady.
Búgin QR Premer-Mınıstriniń orynbasary Eraly Luqpanuly Toǵjanov Medtech medısınalyq tehnıka jónindegi birinshi halyqaralyq forýmǵa qatysý barysynda osylaı dedi, dep habarlaıdy Almaty-akshamy.
Forým 17-shi Qazaqstandyq halyqaralyq Astana Zdorovie-2021 kórmesi aıasynda ótti. İs-sharaǵa dárilik preparattardy ázirleıtin, óndiretin jetekshi otandyq jáne sheteldik farmasevtıkalyq kompanıalar qatysýda.
Forým qatysýshylaryna arnaǵan sózinde Eraly Toǵjanov pandemıa kezeńinde atalǵan forýmdy ótkizýdiń ózektiligin atap ótti: «Pandemıa eldi vaksınalarmen, dárilik zattarmen ǵana emes, medısınalyq jabdyqtarmen de qamtamasyz etý qajettigin kórsetti. Qazaqstanda biz muny basym baǵyt retinde belgiledik. Bizdiń úlken áleýetimiz ben múmkindikterimiz bar».
Vıse-premer Memleket basshysynyń tapsyrmasyn oryndaý maqsatynda Úkimet Qazaqstannyń farmasevtıka salasyn damytý jónindegi arnaıy keshendi jospar qabyldaǵanyn, ony iske asyrý 2025 jylǵa qaraı otandyq óndiristiń dárilik zattary men medısınalyq buıymdarynyń úlesin 50%-ke deıin arttyrýǵa múmkindik beretinin málimdedi.
Eraly Toǵjanov densaýlyq saqtaý júıesiniń ınfraqurylymyn odan ári damytý týraly aıta kele, 2025 jylǵa deıin keminde 20 zamanaýı aýrýhana, 3 onkologıalyq ortalyq, 12 zerthana, medısınalyq buıymdardy zerthanalyq jáne tehnıkalyq synaqtan ótkizýge arnalǵan ortalyq salý josparlanǵanyn jetkizdi. Olardy medısınalyq jabdyqpen jaraqtaý kezinde otandyq óndirýshilerge basymdyq beriletin bolady. Sondaı-aq, vıse-premer kórmege qatysýshylardyń pavılondaryn aralap, farmkompanıalar ókilderi men medısınalyq tehnıka óndirýshilerine jemisti jumys tiledi.