Sý tasqyny jónindegi shtab: Qanat Bozymbaev Atyraý oblysynda TJ joıý jónindegi jumysty úılestiredi
Memleket basshysynyń tapsyrmasy boıynsha Sý tasqynyna qarsy is-sharalardy úılestirý jáne sý tasqyny kezeńiniń saldaryn joıý jónindegi respýblıkalyq shtab jetekshisiniń orynbasary Qanat Bozymbaev qazir – Atyraý oblysynda. Óńirdegi daıyndyq rejımi – joǵary deńgeıde, TJ joıý jónindegi oblystyq jedel shtab jumys istep jatyr.
Vıse-premer Aqtóbe oblysymen shekara aýmaǵyn tikushaqpen aınalyp ótti. Jem ózenindegi zaqymdalǵan bógettiń jaǵdaıyna baǵa berdi. Keshe onyń buzylýy nátıjesinde Qulsary qalasynyń ekinshi jáne úshinshi ýchaskeleri, sondaı-aq «Jadyrasyn-2», «Bolashaq», «Vahtalyq kent» shaǵyn aýdandary, «Qaraǵaı» eldi mekeni sý astynda qaldy.
6 sáýirdegi jaǵdaı boıynsha Atyraý oblysynyń úsh aýdanynda kúrdeli sý tasqyny jaǵdaıy saqtalýda, 2 eldi mekenge kólikpen qatynaý múmkin emes.
Qulsary qalasynda 2,6 myń jeke turǵyn úı men ákimshilik ǵımarat sý astynda qalyp, 5 sáýirden bastap qaýipti aımaqtan 15 632 adam shyǵaryldy. Halyqty evakýasıalaý jalǵasýda.
Qazirgi ýaqytta jaǵalaýdy nyǵaıtý jumystary qarqyndy jalǵasýda, topyraq toltyrylǵan 45,9 myń qapshyq, 174,3 myń tonna ınertti materıal tóseldi. 5 sáýirde Kaspıı teńizine qaraı sý ótkizý qabiletin arttyrý úshin Jem ózeninde muz jarý jumystary júrgizildi, taǵy bir ret muz jarý josparlanǵan.
Ákimdik pen kúshtik qurylymdardyń 600-ge jýyq qyzmetkeri, 148 tehnıka, 2 júzý quraly jáne 500 erikti jumyldyryldy.
5 eldi mekende – Mıaly, Jangeldın, Kózdiqara aýyldyq okrýgteri, Aqqora, Jasqaırat aýyldarynda qaýip-qater seıildi.