Beıtanys jan qarıany qaıyr tileýge májbúrlegen
«Quldyqta ustap, qaıyr tilep aqsha tabýǵa májbúrledi». 10 jyldan astam ýaqyt baqyr surap, beıtanys adamdardyń qyspaǵynan kúni keshe bosap shyqqan 66 jastaǵy áıel bar sumdyqty jaıyp saldy, dep habarlaıdy Almaty-akshamy.kz Almaty.tv-ge silteme jasap.
Taǵdyrdyń qatal synyna ushyraǵan keıýananyń kórmegeni joq. Onyń aıtýynsha, jazdyń ystyǵy, qystyń sýyǵyna qaramastan, dalaǵa tastap, kúnde «salyq» salyp otyrǵan. Jospardy oryndamaǵan kúni ońbaı taıaq jep, mıyna da zaqym kelgen kórinedi.
Beınejazba Almatydaǵy bazardyń birinde kópirde túsirilgen. Bir qaraǵanda qaıyr surap otyr dersiń, biraq kómek suraǵan qartqa keregi aqsha emes. Tósindegi qaǵazǵa jazylǵan nómirdiń, oǵan tipti qatysy da joq. Bostandyqty ańsaǵan áıeldiń aıtýynsha, ony osy ýaqytqa deıin beıtanys adamdar quldyqta ustap, qorlyq kórsetip kelgen. Kúnde qaıyr tileýge shyǵaryp, aıtqan somany jınamaǵan kezde kúsh te qoldanǵan kórinedi.
– Barlyǵyn tartyp alatyn. Kúni boıy jınaǵan aqshadan dym tatyrmaıtyn. Tańerteń bazar jaqtaǵy kópirge qaldyryp, keshke alyp ketip júrdi. Olar qalaǵan somany jınaı almasań, ıt qorlyq kórsetetin. Ońbaı uryp, sulatyp túsiredi. Sodan bolar, esimdi jóndi bilmeımin. Quldyqta menen de basqa adamdar boldy. Olardy qalanyń basqa jaǵyna tastaıdy, – dedi jábirlenýshi
66 jastaǵy áıel qazir ońaltý ortalyǵynda em alyp jatyr. Ony beıtanys adamdardyń qyspaǵynan eriktiler qutqaryp alǵan. «Quldyqtan bosap shyqqan» qarıanyń janashyr týysy ne izdeıtin jaqyny joq. Qujattan da jurdaı. «Aram pıǵyldylar da osy qaýqarsyzdyǵyn bilip, josparyn iske asyrdy» deıdi kómek bergender.
– Bir kisi keldi. Betin tumshalap alǵan, basynda oramal. Ol keldi de, «apany bermeımin. Ol bizdiki» dedi. «Siz kimsiz?» dep surasam, apanyń tósindegi telefon nómirdi julyp aldy. Sosyn ol kameraǵa túspeıtinin aıtty. Apany bermeýge tyrysty. Biz qarsylasyp, alyp kettik, – dedi «Ádil» qaıyrymdylyq qorynyń dırektory Oksana Maralova.
Qaıyrymdylyq qorynyń dırektory buǵan deıin quzyrly organdarǵa shaǵymdanǵanyn, alaıda olar aryzdy qabyldamaǵanyn aıtty. Sondyqtan túsirilim kezinde polısıany shaqyrǵan.
– Aryzyn qabyldaımyz. Tolyqqandy tekserý júrgizip, dene jaraqatyna qatysty tıisti saraptama taǵaıyndalyp, jańaǵy kórsetilgen nómir arqyly bankterge suranystar jiberý arqyly, onyń kimge tıesili jáne qansha qarajat túsip otyrǵanyn bilemiz. Tergeý áreketi tolyq aıaqtalǵan kezde, málimdeme beretin bolamyz, – dedi Naýryzbaı aýdandyq polısıa basqarmasynyń tergeýshisi Muhamedáli Abdınabı.
Alaqan jaıyp, qaıyr tilegenderdi bazar mańyndaǵy kópirden ǵana emes, qalanyń basqa jerinen de kezdestirýge bolady. Alaıda olardyń rasynda qandaı kómekke muqtaj ekenin ekiniń biri surap bilip jatqan joq.
Aıta ketetini, búgingi qoǵamda ózgeniń basyna túsken qaıǵyny óziniń kásip kózine aınaldyrǵandar da bar.